Haaland går viralt i Kina
«Ha baby», «kjempe» og «robotspiss» er nokre av kallenamna Noregs største fotballspelar har fått frå sine kinesiske tilhengjarar.
Erling Braut Haaland har blitt ein internettsensasjon i Kina, ifølgje ScandAsia. På den kinesiske plattforma Weibo har emneknaggar knytt til spelaren over 490 millionar visningar, ifølgje nyheitsstaden.
På den nyoppretta kontoen hans på Douyin, den kinesiske versjonen av TikTok, har han allereie nesten 3 millionar følgjarar. Der svarer han blant anna på spørsmål om kor mykje han et og om han er ein robot (svaret er kanskje), og stadfestar at han nokre gonger spring som om han har tilgang på cheat codes.
Han likar også klengenamnet han har fått, «Ha Bao» eller «Ha baby», som kan bety «Haaland er ein skatt» på mandarin, ifølgje South China Morning Post.
Den kinesiske fanskaren vart spesielt begeistra etter han vart talsperson for den kinesiske drikkevareprodusenten Walovi. Den bisarre reklamen der han pustar flammar går no viralt.
«Det er fantastisk» og «Som eit rampete barn» er nokre av kommentarane på plattforma Weibo.
Skjermbilete frå Weibo, med og utan Google Translate, fordi journalisten ikkje kan mandarin.
