David Attenborough fyller 100 år

Kven er David Attenborough?

David Attenborough blei fødd 8. mai 1926 i Storbritannia. I 1947 gjorde han seg ferdig med ein grad i naturvitskap frå Clare College (University of Cambridge). På universitet fordjupa Attenborough seg i geologi og zoologi.

Han starta å jobbe for BBC som praktikant i 1952. Dei siste 70 åra har han vore stemma og drivkrafta bak fleire prisvinnande naturhistoriske program som Life on Earth, The Private Life of Plants og The Blue Planet.

Tidlegare har han òg vore leiar for BBC Two, ein kanal som opphavleg fokuserer på faktabaserte program. I 1965 sørgde han for at farga TV-kringkasting blei tilgjengeleg i Europa, då han slo dei tyske kringkastarane med tre veker.

I 1975 gav Attenborough seg som leiar i BBC for å fokusere på naturen igjen. Han drog til fleire plassar ingen moderne menneske hadde vore før, blei kjend med isolerte stammefolk og gav oss innblikk i korleis livet på jorda ser ut for dyra og plantene.

I 2026 produserer hundreåringen framleis program om planeten vi bur på.

Riddaren Attenborough

Naturhistorikaren har ikkje berre blitt slått til riddar éin gong, men to gonger.

Første gongen var i 1985. Då blei han slått til riddar av dronning Elizabeth II. Dermed fekk han tittelen sir.

37 år seinare blei Attenborough slått til riddar igjen. Denne gongen til Knight Grand Cross of the Order of St Michael and St George. Dette er ein høgtståande riddarorden som anerkjenner teneste i utlandet, eller teneste knytt til det britiske samveldet.

Attenborough blei adla for arbeidet sitt med TV-kringkasting og bevaring av naturen.