YATA-leiaren: – Det er ein ny verdsorden
Europa er nøydd til å ta meir ansvar for eigen sikkerheit, seier Richard Federhofer.
Denne saka er ein del av prosjektet «Frivilligheit i individualismens tid», som er støtta av Sparebankstiftelsen DNB.
– Vi står i ein heilt ny situasjon, det er ein ny verdsorden, seier Richard Federhofer (29) på telefon til Framtida.
Han er leiar av Youth Atlantic Treaty Association (YATA) i Noreg.
Utanriksminister Espen Barth Eide saman med Richard Federhofer. Foto: YATA Norge
YATA er ein frivillig organisasjon for unge mellom 16 og 35 som har ei interesse for forsvars-, utanriks- og sikkerheitspolitikk.
Federhofer meiner det er kjempeviktig å engasjere seg for sikkerheitspolitikk, no som det er urolege tider.
– Omveltinga vi står i nett no, er nok den største vi har sett sidan Berlinmurens fall. For vår generasjon trur eg fullskalainvasjonen av Ukraina kjem til å ha litt same effekt, seier Federhofer.
Arrangerer stor internasjonal konferanse
For å skape engasjement rundt sikkerheitspolitikk, held YATA konferansar, forelesingar og studieturar, i tillegg til sosiale arrangement, forklarar Federhofer.
I helga arrangerte dei konferansen NorSec, ein internasjonal konferanse retta mot unge.
– Veldig mange av dei store sikkerheitspolitiske konferansane er topptunge, med veldig høg snittalder, seier Federhofer.
– Då er det kanskje ikkje så tilgjengeleg. Vi ønsker å ha ein arena der dei som er litt meir i startfasen av karrieren, kan delta. At ein senkar litt terskelen både for å stille spørsmål, men òg for å danne nettverk.
På konferansen diskuterte dei mellom anna spørsmål om Trump, og at han trugar med å ta USA ut av Nato.
– Trump kan ikkje ta ut USA frå Nato åleine, han treng fleirtal i Senatet for å gjere dette, skriv Federhofer til Framtida.no i ein e-post etter konferansen.
Han peikar på at Trump likevel kan truge med å ikkje etterleve Natos artikkel 5, som seier at eit angrep på eit Nato-land skal blir rekna som eit angrep på heile Nato.
– Dette svekker Natos evne til avskrekking og sikkerheit for Noreg. Europa er framleis avhengig av USA på mange område, men er nøydd til å ta meir ansvar for eiga og Ukrainas sikkerheit. Dette betyr å styrke den europeiske pilaren i Nato og samarbeidet med EU, meiner Federhofer.
Alt er frivillig drive
Konferansen hadde 150 gjester frå 27 land, og alt er arrangert av frivillige i YATA.
– Det er ingen utanom oss som jobbar med det. Eg trur mange synest det er ufatteleg kult å ha vore med på noko i ein så stor skala, seier Federhofer før konferansen.
– Mange blir med i YATA for å skaffe seg kompetanse, nettverk og innsikt. Den kompetansen ein får ved å snakke med så mange dyktige fagfolk og andre engasjerte frå mange ulike land, det opplever vi at mange synest er veldig givande.
Å lage ein så stor konferanse tek tid, og mange timar med frivillig innsats skal balanserast med jobb, studium og privatliv.
– Men veldig mange har lyst til å bidra og synest det er dritkult det vi får til. Dette er et høgdepunkt for mange.
Auke etter invasjonen
Han beskriv den stereotypiske frivillige som ein statsvitskapsstudent.
– Men det er òg ein god del frå humaniora og jussen. Det som er felles, er at dei har interesse for forsvar, sikkerheit og utanrikspolitikk.
Federhofer blei sjølv med då han framleis var student for ti år sidan.
– Vi har hatt ein enorm medlemsvekst sidan fullskala-invasjonen av Ukraina. Sidan fullskala-invasjonen trur eg vi har tredobla medlemstalet. Det er veldig gøy.
Jobbar for å vere til stades
I tillegg til ein auke som følge av invasjonen, seier han at dei har dei jobba mykje for å nå ut til unge.
– Vi er vi openbert mykje på sosiale medium. Det er veldig viktig. Og så er jo lokallaga tydeleg til stades hjå universiteta i deira byer. Då står ein på stand, går på forelesingar, og prøver å vere til stades i studentmiljøa.
Andre ungdomsorganisasjonar Framtida.no har snakka med, har òg hatt ein vekst dei siste åra, trass at fleire framleis slit med rekrutteringa, som fall under koronapandemien.
Framtida.no har sendt ei undersøking om frivilligheit og rekruttering til alle medlemsorganisasjonane til LNU – Noregs barne- og ungdomsorganisasjonar. Vi sende undersøkinga til 104 organisasjonar, og fekk 23 svar.
80 prosent svarar at organisasjonen opplever utfordringar knytt til rekruttering. På påstanden «Det er vanskeleg å få unge til å stille opp til frivillig arbeid» svarar om lag 61 prosent at dei er litt eller svært einige.
Ikkje alvorstyngd
YATA opplever på si side ikkje at det er vanskeleg å få unge til å stille opp. I undersøkinga svarar dei «heilt ueinig» på spørsmål om utfordringar med rekruttering.
Med mykje uro i verda, opplever YATA-leiaren at fleire er opptekne av sikkerheitspolitikk enn tidlegare.
– Fleire er opptekne av det no enn for et par år tilbake i tid, og det merker vi veldig i at det gjer rekrutteringa lettare.
Sjølv om temaa dei diskuterer i organisasjonen er alvorlege, seier Federhofer at det ikkje pregar organisasjonen.
– Det er openbert veldig interessante og viktige spørsmål. Men eg opplever ikkje at vi som organisasjon er alvorstyngd. Eg opplever at det er ei ufatteleg god stemning og mykje engasjement internt i organisasjonen, avsluttar han.
