Fleirtal for Høgres forslag om høgare maksstraff for grov valdtekt
Eit stortingsfleirtal går inn for å endre lova tilbake etter at maksstraffa for grov valdtekt i fjor vart senka. Raudt sikrar fleirtalet for Høgres forslag.
– Valdtekt er eit alvorleg folkehelse- og samfunnsproblem og noko av det mest krenkjande eit menneske kan utsetjast for, seier Seher Aydar i Raudt i ein e-post til NTB.
Eit fleirtal på Stortinget valde i fjor å senke maksstraffa frå 21 til 15 års fengsel. Høgre foreslår no å endre lova tilbake, slik at 21 års fengsel igjen er maksstraffa.
– Valdtekt er eit av dei mest alvorlege brotsverka, og strafferammene må spegle det. Det bør vere mogleg å dømme til 21 års fengsel for dei mest alvorlege valdtektene. Det er på tide å ta side med valdtektsoffera, seier justispolitisk talsperson Mari Holm Lønseth i Høgre til TV 2.
– For meg er valet enkelt: eg står på side med valdtektsoffera. Vi må styrkje stillinga til offera, seier Lønseth.
Ho får støtte av Seher Aydar.
– Ved å auke strafferamma for grove valdtekter, sendast det eit tydeleg signal ut i samfunnet om alvoret i desse brotsverka. I tillegg håpar vi at det kan føre til fleire og strengare dommar, eit større moglegheitsrom for domstolane, og at færre skal oppleve å møte personen som har valdteke dei igjen på gata, seier Aydar.
Lønseth seier at det er inga skam å snu, at dei såg at dette gav dårleg utslag, og at dei no vil rydde opp.
– Dette er eg glad for at eit fleirtal i Stortinget vil vere med oss på, og stå på valdtektsofferas side, seier ho.
I tillegg til Høgre og Raudt, har forslaget støtte frå Frp og KrF.
