Skatteetaten åtvarar: Svindlarar ber om restskatt på Vipps
Stadig meir utspekulerte svindlarar prøver å lure nordmenn som ventar på skattemeldinga, åtvarar Skatteetaten.
– Nytt i år er at enkelte har vorte kontakta på telefon med beskjed om å betale krav på Vipps. Skatteetaten vil aldri ringe deg for å be deg om å betale restskatt via Vipps, seier Ragna Fossen, leiar for tryggleik og beredskap i Skatteetaten, til NTB.
Skatteetaten åtvarar mot å trykkje på lenker. Dei sender aldri lenker du skal trykkje på i samband med skattemelding og skatteoppgjer.
– Om du får meldingar som ser ut til å vere frå oss, og som ber deg klikke på lenker for å betale, få pengar tilbake eller registrere skatteinformasjon, er det svindel, seier ho.
Når det kjem beskjed frå skattestyresmakta, må du sjølv skrive inn adressa i nettlesaren. Skatteetaten seier dei aldri sender lenkene uoppmoda på e-post eller SMS. Dei ringjer heller ikkje uoppmoda i samband med skattemeldinga.
Kvart år blir det rapportert om svindelforsøk i samband med at skattemeldinga blir send ut. Her ser du nokre typiske døme.
Måndag byrja Skatteetaten å sende ut meldingane, men framleis er det mange som ikkje har fått ho. Mange har likevel fått e-post frå svindlarar som gir seg ut for å vere Skatteetaten.
Fleire av dei ser proffe ut, med Skatteetatens logo og feilfritt språk.
– Skatteetaten er godt kjend med at det går føre seg svindel, og vi åtvarar jamleg mot det. Svindlarar blir stadig meir utspekulerte når dei gir seg ut for å vere Skatteetaten. Vi ser at dei kopierer både logo, visuell utforming og språk, seier Fossen. Regelen er altså å alltid sjølv gå inn på skatteetaten.no og logge seg inn der for å sjekke skattekort, skattemelding eller skatteoppgjer.
I fjor opplevde totalt 170.000 nordmenn å få identiteten sin misbrukt, og 340.000 til var utsette for forsøk på misbruk, viser tal frå NorSIS.
Tips for å ikkje bli lurt
- Sjå nøye på sms og e-postar du får. Ta ei kritisk vurdering av e-posten og sjekk sendar, tenk over om dette kan vere rett. Sunn skepsis er aldri feil.
- Samanlikn e-postadressa med tidlegare ekte e-postar. Sjå spesielt etter falsk avsendaradresse, dårleg språk og stavefeil. Dei kriminelle blir stadig flinkare til å produsere falske e-postar og sms.
- Ver særleg merksam om du i ein sms eller e-post blir beden om å oppgi sensitive opplysningar som kontonummer eller tryggingskodar.
- Ikkje opne vedlegg frå ukjende, klikk ikkje på lenker ukritisk og skriv sjølv inn internettadresser i nettlesaren.
- Spesielt på mobil kan det vere freistande å klikke på ei lenke i farten, ikkje gjer det.
- Er du i tvil, dobbelsjekk med den rette avsendaren på til dømes skatteetaten.no eller ta ein telefon til oss på 800 80 000.
Kjelde: Skatteetaten.no
