Regjeringa deler ut 57 olje- og gasslisensar: – Enorm klimatragedie
19 ulike selskap får 57 ulike leiteløyve for olje og gass i konsesjonsrunden TFO 2025. Samtidig blir det foreslått å utvide TFO-området.
– Noreg er Europas viktigaste energileverandør, men om få år vil produksjonen byrje å falle. Derfor treng vi nye prosjekt som kan bremse fallet og gi mest mogleg produksjon, seier energiminister Terje Aasland i ei pressemelding.
Tildeling i førehandsdefinerte område (TFO) er den årlege konsesjonsrunden for dei mest kjende leiteområda på norsk kontinentalsokkel som ikkje allereie er konsesjonsbelagd. TFO omfattar no størstedelen av dei tilgjengelege leiteområda.
Av dei 57 løyva som no blir delte ut, ligg 31 i Nordsjøen, 21 i Norskehavet og fem i Barentshavet.
– Det er eit stort bidrag for å sikre aktivitet i olje- og gassnæringa, og den aktiviteten er viktig for arbeidsplassar, verdiskaping og Europas energitryggleik, seier Aasland.
MDG: Ein enorm klimatragedie
Fleire parti på venstresida reagerer med skuffelse.
– Verda står i brann, og klimakrisa herjar med oss. Svaret frå regjeringa er å la oljeselskapa leite etter meir fossil energi. Det er djupt uansvarleg, seier miljøpolitisk talsperson for SV Lars Haltbrekken i ein kommentar.
– Hovudårsaka til klimakrisa er og held fram med å vere olje, kol og gass. Verda har allereie funne meir olje og gass enn vi kan brenne om vi skal nå klimamåla. Å tildele 57 nye oljelisensar er ein enorm klimatragedie, seier Frøya Sjursæther (MDG).
Frp: For mykje tom prat
Framstegspartiet meiner likevel at regjeringa må gjere meir for oljenæringa.
– Det er for mykje tomprat og for lite handling. Noreg har store område som er lukka for oljeselskap og kvar Sokkeldirektoratet peikar på at det er store ressursar, seier stortingsrepresentant Kristoffer Sivertsen (Frp).
Framstegspartiet meiner det hastar med å opne fleire leiteareal for å gjere det vi kan for å snu fallet i produksjonen og gjere sokkelen attraktiv for fleire selskap.
Utset 26. konsesjonsrunde
Stortinget vedtok i fjor at det også skal lysast ut heilt nye, umodne område gjennom 26. ordinære konsesjonsrunde. Planen var å lyse ut runden i starten av 2026, men det blir det ingenting av i år, seier energidepartementet.
– Som følgje av petroleumsfaglege vurderingar omfattar den foreslåtte utlysinga areal som selskapa har nominert til 26. konsesjonsrunde. Det blir derfor ikkje gjennomført ein 26. konsesjonsrunde i 2026, heiter det i pressemeldinga.
Interesseorganisasjonen Offshore Norge, som representerer meir enn 100 bedrifter knytte til norsk sokkel, meiner det er viktig å få gjennomført den 26. konsesjonsrunden.
– Det er viktig at regjeringa kjem med 26. runde, og vi har forventningar om at ho vil innehalde attraktivt areal. Skal vi klare å redusere fallet i produksjon som vil komme, er det heilt avgjerande at det blir gjort tilgjengeleg attraktivt areal i åra framover, seier administrerande direktør Hildegunn T. Blindheim.
Vil utvide TFO-området
Samtidig foreslår energidepartementet å leggje til 70 nye blokker i TFO-området. Det er snakk om 22 blokker og delar av blokker i Nordsjøen, 10 i Norskehavet og 38 i Barentshavet.
– Å gi selskapa tilgang til nytt og attraktivt areal årleg er ein berebjelke i politikken til regjeringa for å vidareutvikle næringa. Dette legg til rette for nye funn og sikrar framtidig produksjon og verdiskaping. Produksjon som er viktig for energitryggleiken i Europa, seier Aasland.
