Regjeringa føreslår tre tiltak mot ungdomskriminalitet
Etter ein kraftig auke i såkalla valdsoppdrag, der unge tek på seg å utføre vald på vegner av andre, har regjeringa fleire tiltak klare.
Kripos har nyleg åtvara om at kriminelle rekrutterer barn og unge til å utføre vald og alvorleg kriminalitet. Etter granat-episoden i Oslo og skytinga i Sarpsborg førre veke, er åtte gutar hanka inn eller pågripne, skriv VG.
På spørsmål frå avisa har Justisdepartementet samanfatta ei oversikt over pågåande lovforslag og tiltak mot trenden.
Regjeringa foreslår å gjere det straffbart å rekruttere mindreårige til lovbrot. Strafferamma er foreslått til tre års fengsel, og meir dersom barnet er under den kriminelle lågalderen på 15 år.
Tiltaka:
- Gjere det straffbart å rekruttere mindreårige til lovbrot.
- La politiet få utlevert Ip-adresser for å førebyggje alvorleg kriminalitet.
- La barnevernsinstitusjonar opne meldingane til barna.
Vidare ønskjer dei at politiet kan få utlevert Ip-adresser for å førebyggje alvorleg kriminalitet, ikkje berre ved etterforsking som er tilfellet i dag.
Til slutt vil dei la barnevernsinstitusjonar opne korrespondansen til barn, til dømes ved å sjå på meldingar på mobilane til barna. Dette er forbode i dag.
Dei mest aktive ungdomskriminelle i Oslo er gutar med minoritetsbakgrunn som sjølv har vore utsette for vald, ifølgje politimeister Ida Melbo Øystese.
