KrF avviser at Lofoten vart brukt i bytehandel
Kristeleg Folkeparti avviser kategorisk at partiet kravde ein K for kristendom i namnet på RLE-faget for å gå med på vern av Lofoten og Vesterålen.
Denne artikkelen er eldre enn 1 år gamal. Det betyr at noko av informasjonen kan vere utdatert.
Avviser Lofoten-bytehandel
Under trontaledebatten i Stortinget tysdag sa Venstres leiar Trine Skei Grande, ifølgje Vårt Land, at ho var «villig til å gi ein K i eit fag for vern av Lofoten og Vesterålen».
– Den var eitt av mange småpunkt vi måtte gi. Eg gav meg på ein bokstav, men det var verdt det. Det er berre å kikke utover havet der, så er saka klar, sa ho, ifølgje avisa.
KrFs parlamentariske nestleiar Hans Olav Syversen meiner på si side at denne framstillinga av saka er djupt misvisande.
– Det stemmer i det heile ikkje at K-en i KRLE er komme inn fordi vi «handla» med Lofoten og Vesterålen, seier Syversen til NTB.
Ifølgje Syversen er vern av Lofoten og Vesterålen eitt av dei viktigaste punkta i samarbeidsavtalen, også for KrF.
– Vi har alltid vore einige med Venstre om Lofoten og Vesterålen. Vi har stått saman med Venstre i denne saka, seier han.
Syversen er bekymra for at eit feilaktig inntrykk skal feste seg i saka.
– Det er mange som lurer på om løftet vi gav i valkampen, vart gått ifrå ved forhandlingsbordet, seier han.
Ifølgje samarbeidsavtalen skal RLE-faget skifte namn til KRLE (kristendom, religion, livssyn og etikk). (©NPK)
