Uviss draum
Høve til å vera kreativ og det å kunne gjere ting på sin måte, er noko av det Jostein Venås set pris på med film som kunstform.
Denne artikkelen er eldre enn 1 år gamal. Det betyr at noko av informasjonen kan vere utdatert.
– Eg har ein draum om å leve av film, men om det er mogeleg eller om eg må ha ein annan jobb i tillegg, det er uvisst, seier Jostein Venås.
18. åringen frå Hemsedal skipa firmaet Venaas film, så fort han hadde høve til å registrere seg i Brønnøysundregisteret. No filmar han konsertar og arrangement, i tillegg til å digitalisere gamle filmar og bilete.
– Film vart ein hobby i 7. – 8. klasse. Det verka så spanande, og så likar eg at det er så mykje forskjellig å drive med, forklarar Jostein.
LES OGSÅ: Designblikk
Finne marknaden
Ein del av verksemda er å digitalisere gamle videokassettar og lysbilete.
– Det er moro å kunne redde gamle filmklipp, sikre videokassettane av borna og gje folk høve til å sjå at filmar dei ikkje har sett på mange år, forklarar Jostein.
Han trur absolutt det er ein marknad for slik digitalisering, og at utfordringa ligg i å finne denne.
Fridom
– Eg likar fridomen i det å filme. Til dømes på konsertar, for sjølv om ein veit kva som skjer, kan ein slik film gje mange ulike resultat, alt etter kva verktøy ein brukar. Eller å filme skikøyring, der eg kan eksperimentere, forklarar Jostein.
Det var fetteren som inspirerte Jostein til å byrje med film, og som gav han dei grunnleggande kunnskapane. Seinare har han prøvd seg fram på eigen hand, og han har henta tips og triks frå internett.
– Å ikkje gjere alt etter boka er viktig. For meg er det fint å kunne gjere ting på min måte, avsluttar Jostein Venås.
Sjå ein av filmane han har laga:
