Awaatef (21) og Kitty (19) er blant dei nominerte til Jenteprisen: – Føler allereie at eg har vunne

– Det betyr utruleg mykje. Eg føler allereie at eg har vunne, sjølv om eg berre har blitt nominert!

Det seier Awaatef Abdullah Hassan på telefon til Framtida.

Då årets nominerte til Jenteprisen vart lagt fram onsdag, fann ho sitt eige namn på lista. 21-åringen frå Grimstad trudde ikkje at samfunnsengasjementet hennar hadde blitt lagt merke til på eit så høgt nivå, og hadde eigentleg ikkje tenkt på seg sjølv som ein aktuell kandidat.

– Det er ei kjempestor anerkjenning, og noko som rett og slett gjer det enda meir motiverande å fortsetje å vere synleg og vere ein representant for andre minoritetskvinner i same situasjon som meg, fortel ho.

Awaatef Abdullah Hassan ønskjer å vere ein representant for kvinner med minoritetsbakgrunn i høgare utdanning. Foto: Mathea Barlund

Deler tips på TikTok

Plan International Norge deler årleg ut Jenteprisen til ein person eller organisasjon som har gjort ein særleg innsats for å fremje jenters rettar og likestilling.

Hassan har engasjert seg i samfunnet sidan ho var 16 år, og har skrive fleire kronikkar i norske medium, mellom anna om kjønnsbalanse i arbeidslivet, støtte til kvinner i Iran og om kong Haralds betydning for personar med minoritetsbakgrunn.

No har ho òg flytt engasjementet sitt over på plattformer som LinkedIn og TikTok. Der deler ho mellom anna studietips.

– Eg syntest det mangla litt. Eg veit at det kan vere ein tryggleik for andre i min situasjon, for eg er ei minoritetskvinne, muslim og samstundes tar eg ein utradisjonell karriereveg. Ein ser ikkje så mange i min situasjon på sosiale medium, seier Hassan, som studerer statsvitskap ved Universitetet i Stavanger.

Ho synest det er viktig å vise sjølvstende og styrke som kvinne.

• Her kan du lese eit meiningsinnlegg ho har skrive for Framtida.no: «La vgs-elevar skrive ei bacheloroppgåve – det gir meining!»

Utdanning for jenter

Utdanning for kvinner er ei av hjartesakene hennar.

– Eg er veldig stolt og privilegert som kan ta kva som helst utdanning eg vil utan å måtte tenke på barrierar og utfordringar på grunn av kjønnet mitt.

Hassan trekker fram korleis det er for jenter i Afghanistan. Etter at Taliban tok over makta i 2021, har den islamistiske rørsla innskrenka rettane til jenter på mange område, og dei får ikkje ta utdanning etter sjetteklasse.

I fjor var det Ayesha Wolasmal som fekk Jenteprisen, nettopp for arbeidet for jenter og kvinners rettar i Afghanistan.

– Det er jenter frå sjuandeklasse og opp som gret seg i søvn kvar kveld fordi det dei hata med skulen, er det dei saknar mest no. Dei vil ha lekser, dei vil kome seg til eit klasserom, fordi dei blei fråtekne den grunnleggjande retten over natta, sa Wolasmal til Framtida den gongen.

Ayesha Wolasmal fekk Brageprisen for boka «Tusen dager med Taliban». I fjor fekk ho også Jenteprisen for arbeidet sitt i Afghanistan. Foto: Agnete Brun