Slik kan du sjå kong Haralds båre
Frå tysdag kan alle som ønskjer det, ta farvel med kong Harald ved å gå sakte forbi båra i Slottskapellet.
Slottskapellet blir opna for folk tysdag klokka 14–18. Deretter er Slottskapellet ope kvar dag frå klokka 10–18 til og med tysdag 8. september.
Slottskapellet ligg på høgre side av Slottet, sett frå Slottsplassen.
Kong Haralds båre har stått i Den raude salongen sidan overføringa frå Rikshospitalet fredag kveld, men blir i dag flytta til Slottskapellet i ein seremoni. Familien, hoffet og adjutantstaben skal deretter ta farvel i ei privat minnestund.
I Slottskapellet skal båra stå på ein fløyelskledd katafalk, ei slags opphøgd plattform, med kransar og blomsterhjarte frå familien rundt. Kongekrona og rikssverdet blir plasserte på båra, og kong Haralds ordenar blir plasserte ved fotenden til båra. Kista er lukka.
Mange har lagt ned blomar, helsingar og tent lys utanfor slottet. Foto: Birgitte Vågnes Bakken
Ventar over 100 000
Kadettar frå Forsvarets krigsskular skal stå bårevakt døgnet rundt – to på kvar side. 40 kadettar har fått oppdraget. Det er venta at mange kjem til å ta turen for å ta farvel med kong Harald.
– Vi reknar med at det kjem over 100 000 personar som skal gå forbi båra med ulike reaksjonar. Det står kadettane og ser rett imot, på menneska som går forbi, seier oberst Geir Pettersen, sjef for FHS Krigsskulen, til NRK.
Ifølgje Pettersen sender Krigsskulen i Oslo, Sjøkrigsskulen i Bergen og Luftkrigsskulen i Trondheim nokre av sine aller beste folk til oppdraget.
– Det handlar om ferdigheiter, verdiar og erfaringar dei har, seier han.
Det blir flagga på halv stong for kong Harald på slottet. Foto: Birgitte Vågnes Bakken
Rørt av blomsterhavet
I dagane etter at kong Harald døydde, har tusenvis lagt ned blomar og lys på Slottsplassen. Då kong Haakon laurdag heldt minnetale for far sin, viste han til blomsterhavet og sa at det gav trøyst.
– Vi er i sorg. Samtidig gir det trøyst og styrke at så mange sørgjer saman med oss. Det har vore ei sterk og rørande oppleving å sjå Slottsplassen bli fylt av folk, blomar, helsingar og lys. Tusen takk, sa han.
Kong Harald blir gravlagd onsdag 9. september. Seremonien startar i Oslo domkyrkje klokka 13.
Blomehavet framføre slottet fredag kveld 28. august. Foto: Birgitte Vågnes Bakken
