Rapport: Auka skepsis til pride-markering
Eit fleirtal meiner at det er viktig at pride blir markert, og er positive til at offentleg styresmakter deltek. Likevel har skepsisen til markeringa auka sidan 2022, ifølgje ein ny rapport.
Det kjem fram i rapporten «Befolkningens holdninger til LHB T+ personar». På oppdrag frå Barne-, ungdoms- og familiedirektoratet (Bufdir) har Opinion gjennomført ei befolkningskartlegging av haldningar til LHBT+ personar. 5066 har svart undersøkinga.
Andelen som meiner pride-markeringa tek for mykje plass, har auka frå 32 prosent i 2022 til 45 prosent. Menn i 70-åra og eldre er mest skeptiske til pride totalt sett.
Geografisk er Oslo-befolkninga mest positive til pride, og i Trøndelag er det færre enn elles i landet som meiner markeringa tek for stor plass.
Positive til lesbiske, homofile og bifile, men ikkje framgang
Eit fleirtal av befolkninga oppgir positive haldningar til lesbiske, homofile og bifile. Sidan 2008 er andelen med negative haldningar omtrent halvert, og utviklinga har vore jamt positiv fram til 2022. Likevel har den positive utviklinga stoppa opp i år, og andelen med negative haldningar held seg på same nivå som førre måling i 2022.
– Vi følgjer særleg med på auken i negative haldningar, seier divisjonsdirektør Anne Magdalena Solbu Kleiven i Bufdir i ei pressemelding.
Mønsteret varierer mellom kvinner og menn, der kvinner under 30 er gruppa som er mest positive. 80 prosent oppgir positive haldningar til homofile menn – den høgaste andelen i nokre grupper. Blant unge menn under 30 år er biletet annleis – den høgaste andelen har negative haldningar til lesbiske og homofile.
Geografisk er befolkninga i Oslo klart meir positive til skeive enn resten av landet, medan negative haldningar er mest utbreidd i Rogaland, Agder og Telemark.
Fleire har negative haldingar til transpersonar
Medan nærare halvparten av befolkninga er positive til transpersonar, har andelen med negative haldningar auka med 5 prosentpoeng sidan førre måling.
Negative haldningar er meir utbreidd overfor transpersonar enn overfor lesbiske, homofile eller bifile. Skepsisen er endå tydelegare rundt spørsmål om deling av garderobe med ein transperson, ein auke på ti prosentpoeng sidan 2022.
– Vi trur at auka kunnskap og kompetanse om transpersonar og kjønnsmangfald er nøkkelen til å endre haldningar i samfunnet. Bufdir vil halde fram med å utvikle kunnskap og tiltak som fremjar aksept og rettar for alle som bryt med normer for kjønn og seksualitet, seier Solbu Kleiven.
