KrFU-forslag: 19-åringar må på beredskapskurs

I forslaget til nytt partiprogram foreslår programkomiteen i KrFU at dei ser for seg at alle 19-åringar skal påleggjast eit sommarkurs.

Torkel Johannes Bjuland er 2. nestleiar i KrFU. Foto: KrFU

– Der skal dei lære til dømes å overleve i naturen, men også å beskytte seg sjølv, seier leiar for programkomiteen Torkel Bjuland, til Klassekampen.

Han seier at ikkje alle treng våpentrening, men at alle kan ha nytte av å lære seg å verne seg sjølv og at det vil styrke tryggleiken til folk å vite kva rolle dei skal spele i ein krig.

I programforslaget blir det også foreslått å senke handlingsregelen til 2 prosent, fjerne formuesskatten og kutte budsjetta i offentleg sektor. Det blir også foreslått ei kulturell opprusting, der dei vil krevje at innvandrarar signerer «verdikontrakt» og at det blir lagt større vekt på den kristne fellesskapen rundt nasjonen.

– Vi meiner det har vore for mykje innvandring, og at vi ikkje har klart å integrere folk godt nok. Integrering handlar ikkje berre om språk og arbeid – det handlar også om verdiar og kultur, seier Bjuland.

Han er ikkje så oppteken av om folk meiner programmet tek ei høgrevridd retning.

– Det viktigaste er at dette er løysingane Noreg treng. Det er verda som har endra seg. Då må politikken endre seg òg, seier Bjuland.

Programutkastet skal behandlast vidare i KrFU før endeleg vedtak.