Høgre innstiller Svenneby og Asheim til nestleiarar
Ine Eriksen Søreide blir føreslått som leiar.
Henrik Asheim og Ola Svenneby blir føreslått av valkomiteen som nestleiarar i Høgres nye partileiing. Ine Eriksen Søreide blir som venta føreslått som leiar.
– Til saman meiner komiteen at dette er laget Høgre treng for å løfte seg til å bli det leiande partiet på borgarleg side igjen, seier leiaren i valkomiteen Christian Ingebrigtsen, som også er leiar av Trøndelag Høgre, i ei pressemelding.
Det blir kalla inn til ein pressekonferanse på Høgres hus klokka 14.15 der dei innstilte kandidatane blir presenterte.
– Prosessen har vore grundig og vi har teke oss god tid; derfor har vi også klart å lande på ei einskapleg innstilling. Ho er basert på grundige samtalar og forventningsavklaringar med kandidatane, men også forventningar ute i partiet, seier Ingebrigtsen. Ei heilt ny Høgre-leiing blir vald på eit ekstraordinært landsmøte i februar neste år. Valkomiteen føreslår også at Peter Frølich og Grete Ellingsen går inn i det mektige arbeidsutvalet.
Margret Hagerup blir føreslått som leiar av Høgres kvinneforum.
Erna Solberg kunngjorde i haust at ho trekkjer seg som Høgre-leiar etter 21 år.
Leiartrioen som no blir føreslått, har fått kritikk for å vere for Oslo-sentrert.
Ine Eriksen Søreide er frå Oslo, men er også oppvaksen i Akershus og Troms.
– Komiteen trekkjer fram Eriksen Søreides breie erfaring frå Stortinget, tunge komitéleiarverv og fleire statsrådspostar, men også evna til å samle og motivere organisasjonen.
Henrik Asheim sit allereie i partileiinga som nestleiar, og blir foreslått attvalt. Han er frå Akershus og er stortingsrepresentant på det 12. året. Han sit no i finanskomiteen.
Ola Svenneby er avtroppande Unge Høgre-leiar. Han kjem opphavleg frå Hedmark, men stilte til val til Stortinget frå Oslo og kom ikkje inn.
