I kveld blir Noregs VM-gruppe trekt – dette er alt du må vite

Kennedy Center i den amerikanske hovudstaden er arena når Noreg fredag er med i ei VM-trekking for første gong på 28 år.

Spenningsmomenta er mange for landslagssjef Ståle Solbakken, som er på plass i Washington. Utfallet legg premissane for Noregs moglegheiter for avansement til cupspelet.

Erling Braut Haaland og co. er i pott nummer 3 i trekkinga. Hadde Bosnia-Hercegovina slått Austerrike i siste kvalifiseringskamp, ville Noreg hoppa opp til pott 2 og potensielt fått enklare motstand.

Austerrike er framfor Noreg på Fifa-rankinga og sørgjer for at Noreg er høgast rangerte lag i pott 3.

Noregs landslagssjef Ståle Solbakken er på plass i Washington for å følgje VM-trekkinga. Han vil nok juble om han slepp å møte Spania i VM. Foto: Lise Åserud / NTB / NPK

Kontrastar

I trekkinga fredag blir først laga plasserte frå pott 1 i gruppene sine, deretter laga frå pott 2. Når det er Noregs tur, blir Solbakkens menn trekte inn i ei gruppe der det allereie er to lag frå dei øvste seedingnivåa.

Vel så spennande kan det bli når den siste motstandaren, frå pott nummer 4, skal veljast. Der kan det bli store kvalitetsforskjellar mellom laga.

Fifa held seg nemleg til den tidlegare planen om at lag som går til VM via omspel til våren, blir plassert på fjerde seedingnivå. Det gjekk rykte om at ein ville gå tilbake på det, men alle omspelslaga går inn i pott 4.

Det betyr at potensielle motstandarar frå det nivået kan vise seg å bli alt frå Italia (om dei tek seg heilskinna gjennom omspelet) til langt mindre meritterte nasjonar som Kapp Verde og Curaçao.

Likevel vil eksempelvis Italia berre vere eit alternativ for Noreg om dei ikkje allereie har fått ein europeisk motstandar frå dei to øvste seedingnivåa. Europeiske lag kan nemleg få høgst éin europeisk gruppemotstandar, og ulike lag frå andre kontinent kan ikkje hamne i same gruppe.

Dette er pottane

Fifa har elles lansert ei nyvinning før trekkinga fredag. Ho inneber at gruppene med dei fire høgast rangerte laga blir plassert på sluttspelstreet slik at gruppevinnarane ikkje kan møtast før langt ut i cupspelet. Det dreier seg om Spania, Argentina, England og Frankrike.

Spania og Argentina blir plassert på kvar sin halvdel av sluttspelstreet, og det same blir gjort med Frankrike og England. Om desse laga vinn gruppene sine, kan dei ikkje støyte på kvarandre før i semifinalen, og para som hamnar på kvar sin halvdel kan ikkje møtast før i finalen.

Bortsett frå VM-vertsnasjonane USA, Canada og Mexico, som automatisk vart plassert i pott 1, er seedinga basert på rekkefølgja i siste Fifa-ranking.

Det er allereie klart at Mexico skal inn i gruppe A, Canada i B og USA i D. Førstnemnde speler VMs opningskamp 11. juni, og motstandaren blir eit lag frå pott 3. Noreg er med andre ord ei moglegheit.

Slik ser pottane ut før trekkinga:

Pott 1:

Canada, Mexico, USA, Spania, Argentina, Frankrike, England, Brasil, Portugal, Nederland, Belgia, Tyskland.

Pott 2:

Kroatia, Marokko, Colombia, Uruguay, Sveits, Japan, Senegal, Iran, Sør-Korea, Ecuador, Austerrike, Australia.

Pott 3:

Noreg, Panama, Egypt, Algerie, Skottland, Paraguay, Tunisia, Elfenbeinskysten, Usbekistan, Qatar, Saudi-Arabia, Sør-Afrika.

Pott 4:

Jordan, Kapp Verde, Ghana, Curaçao, Haiti, New Zealand, europeiske omspelsvinnarar (veg 1-4) og interkontinentale omspelsvinnarar (veg 1 og 2).

Trekkinga skjer fredag frå kl. 18 norsk tid, skriv VG.

Det er venta at Fifa laurdag stadfestar VM-speleplanen med kampstad og avsparkstid for alle kampane. Då kan planlegginga av VM-sommaren starte både for deltakarar og supporterar.