Meta vil innføre tenåringskontoar på Facebook etter Instagram-suksess
Tekgiganten Meta har kunngjort at dei skal lansere tenåringskontoar på Facebook etter nyleg å ha innført restriksjonar på Instagram.
I september i fjor introduserte Meta konseptet tenåringskonto på biletplattforma Instagram i eit forsøk på å verne mindreårige mot skadeleg innhald i appen.
Tenåringar mellom 13 og 15 år vart den gongen med ein gong plasserte på slike kontoar, og brukarar under 16 år har ikkje vore i stand til å endre innstillingane utan samtykket til foreldra.
Dei kommande månadene skal denne funksjonen også introduserast på Facebook.
Høg skjermbruk blant unge skaper bekymring verda over. Meta innfører no tiltak. Minst 54 millionar tenåringar har for tida ein tenåringskonto på Instagram, ifølgje Meta.
Hindrar direktestrøyming
Det skal hindre mindreårige i å kunne sende direktestrøyming, og fråta dei moglegheita til å skru av vernemekanismen som hindrar uønskte bilete og direktemeldingar.
– Tenåringskontoar på Facebook og Messenger vil tilby liknande, automatiske vern for å avgrense mengda upassande innhald og uønskt kontakt, og dessutan sikre at tenåringar bruker tida si rett, heiter det i ei fråsegn frå Meta.
Tenåringskontoane blir i første omgang tilgjengelege i USA, Storbritannia, Australia og Canada, men skal introduserast i andre land seinare.
Tidsavgrensingar
Minst 54 millionar tenåringar har for tida ein tenåringskonto, som også avgrensar talet på varslingar om natta og sender påminningar om å forlate appen etter éin time.
Tenåringsbrukarar kan berre bli tilsende meldingar frå brukarar dei følgjer eller allereie har kontakt med.
Bruk av sosiale medium blant ungdommar har skapt bekymring dei siste åra, særleg mengda skjermtid og mangelen på moderering på enkelte plattformer.
Seinast i november stemde Australia for å forby sosiale medium for barn under 16 år, og TikTok har lansert ein funksjon i EU som tillèt foreldre å avgrense tenåringars tid i appen.
