Auke i spørsmål om krig i Noreg frå unge
Ung.no har merka ein auke i spørsmål frå unge om det blir krig i Noreg. Førespurnadene har auka sidan Donald Trump tok over som president i USA.
– Vi kan sjå ein liten auke knytt til bekymring blant unge om tredje verdskrig og krig i Noreg, seier seniorrådgivar Christine Havdal i Bufdir, som står bak nettsida Ung.no, til Klassekampen.
Nettsida får dagleg inn rundt 300 spørsmål frå barn og unge. Det siste året har dei fått rundt 260 spørsmål knytt til uro om for krig og den generelle verdssituasjonen, men berre den siste veka kom det inn 18 slike spørsmål.
– Det svinga opp litt etter at Trump gjekk på som president, seier Havdal.
Havdal seier at unge får mykje informasjon frå sosiale medium, spesielt TikTok, og understrekar at det er viktig å minne dei om kjeldekritikk.
Barne- og familieminister Lene Vågslid (Ap) seier det er naturleg at unge kjenner på uro om dagen. Derfor er det viktig at dei får tak i faktabasert informasjon, meiner ho, og peikar spesielt på foreldra.
– Ein må snakke med sine eigne barn om dette, vere nysgjerrig på kva barna tenkjer, og la dei stille spørsmål.
