Vekas viktigaste: Matopprør, Ukraina-hjelp og miljøsiger

Opprør i flyktningleir etter kutt i matrasjonane

Måndag braut det ut opprør i den store flyktningleiren Kakuma i Kenya. Ifølgje The Guardian vart det brukt tåregass mot demonstrantane. Fire flyktningar og ein lokal embetsmann skal ha vorte skadd.

Flyktningane hadde fått beskjed om at matrasjonane vart kutta til 40 prosent av minimumsrasjonane, som følgje av USA sin naudhjelpsstans.

Flyktningleiren Kakuma i Kenya har 300 000 flyktningar der majoriteten kjem frå Sør-Sudan, men òg Somalia, Kongo og Etiopia.

Verdas matvareprogram har fått halvert budsjettet etter at USA fraus all internasjonal naudhjelp og må stengja kontoret sitt i Sør-Afrika.

Òg i Bangladesh har organisasjonen måtta kutta rasjonane til rohingya-flyktningane, som går frå 12,5 dollar til 6 dollar per person neste månad, ifølgje Reuters.

Sivilombodet er uroleg for isolasjon i norske fengsel

Denne veka leverte Sivilombodet ei melding til Stortinget om isolasjon i norske fengsel.

Ifølgje rapporten sit mange innsette isolert på cella 19–22 timar i døgnet på grunn av mangel på skule- eller arbeidstilbod, få tilsette og lite eigna fellesareal.

Sivilombod Hanne Harlem er uroa for situasjonen, som har blitt verre etter førre melding i 2019. Ho slår fast at innsette bør opphalda seg minst åtte timar dagleg utanfor cella med aktivitet og sosial kontakt.

– Dette er ein internasjonal minstestandard som det er openbert at Noreg bør oppfylla, seier ho i ei pressemelding.

Sivilombodet har gjennomført uvarsla tilsyn med ti fengsel og hatt samtalar med 200 innsette og 230 tilsette.

Forskarar varslar fedmeepidemi

Ein forskingsrapport publisert i tidsskriftet The Lancet åtvarar om at over halvparten av verdas vaksne og ein tredel av barn og unge kan vera overvektige eller ha fedme i 2050.

Det kan dreia seg om 3,8 milliardar vaksne og 746 millionar barn og unge, ifølgje VG.

Professor Emmanuela Gakidou ved University of Washington leia studien og kallar den globale epidemien av overvekt og fedme «ei djup tragedie og ein monumental samfunnssvikt».

Forskarane er spesielt uroa for situasjonen i låg- og mellominntektsland, som ikkje har helsetenester som kan takla sjukdommar som følgjer med fedme og overvekt. Det er forventa 250 prosent auke i personar med fedme og overvekt i Afrika sør for Sahara innan 2050.