Vekas viktigaste: Klimatoppmøte, Giske-liste og kabinettspørsmål i Tyskland

Trond Giske kan bli Ap sin 1.-kandidat til Stortinget frå Sør-Trøndelag

Onsdag vart det klart at det blir flest av tilhengjarane til Trond Giske blant delegatane for Trondheim Arbeidarparti. Dei er med og røyster over kven som blir Ap-kandidatar til Stortinget frå Trøndelag.

Det tyder at Trond Giske truleg blir Arbeidarpartiet i Sør-Trøndelag sin førstekandidat til Stortinget i 2025.

Ifølgje Altinget meiner mange at fleirtalet, styrt av Giskes lokallag Nidaros Sosialdemokratisk Forum, har overkøyrt innspel frå andre lokallag.

Den nye AUF-leiaren Gaute Skjervø reagerer spesielt på få yngre delegatar.

– For å sikre sitt eige attval har Trond Giske valt å reinske ut alle andre enn sine eigne tilhengarar frå lista over dei som skal velje Trøndelag Arbeiderpartis stortingsrepresentantar. Av 57 delegatar frå Trondheim Ap fann ikkje Giske plass til éin einaste AUF-ar. Ikkje eingong nokon under 30, skreiv han på Facebook.

Telenor-feil rammar naudnummer for fjerde gong på fire månader

Onsdag hadde Telenor tekniske feil som ramma brukarar over heile landet. Naudnummera var også påverka.

Feilen vart retta innan klokka 17.

Dette er fjerde gong i haust at Telenor-feil rammar naudnummera, noko digitaliseringsminister Karianne Tung (Ap) seier er alvorleg.

– Det er heilt uakseptabelt at Telenor for fjerde gong på fire månadar har feil som rammar mobiltenestene og naudmeldingstenestene. Det er Telenor sitt ansvar, seier ho til NRK.

Feilen ramma også togtrafikken, med fleire forseinkingar på grunn av kommunikasjonsproblem.

Årsaka bak feilen var eit straumbrot hjå ein av Telenor sine sentralar rundt klokka 11, og selskapet seier dei jobbar med å finne ut kvifor det fekk så store utslag.

Lyspunkt: Norsk setertradisjon inn på Unesco-liste

Unesco si liste over immateriell kulturarv kjem til å inkludere norsk setertradisjon frå 4. desember, ifølgje avisa Nationen.

Det er ei liste over kulturuttrykk som ikkje er fysiske, som handverk, dans, songar og andre kulturelle praksisar. Frå før er ting som folkemusikk og -dans frå Setesdal, bakinga av franske bagettar og kinesisk kalligrafi på lista.

Organisasjonen Norsk Seterkultur starta arbeidet med å få setertradisjonen inn på lista i 2019.

– Håpet er at ein slik heider frå Unesco skal vere med på å heve statusen til seterdrifta og hjelpe til med å vidareføre denne tradisjonen inn i ei ny tid, skriv organisasjonen på sidene sine.