![](https://framtida.no/wp-content/uploads/2024/05/NTB_iykzOfmYjXQ-kopi-1200x1099.jpg)
Vekas viktigaste: «Utanlandsk agent»-lov, studentdemonstrasjonar og hetebølgje i Asia
Les deg opp på nokre av sakene som har prega mediebiletet den siste veka!
![](https://framtida.no/wp-content/uploads/2021/01/Birgitte-byline-160x160.jpg)
Birgitte Vågnes Bakken, Andrea Rygg Nøttveit
Publisert
Amerikanske studentdemonstrasjonar for Palestina
Studentar har den siste veka demonstrert for Palestina ved ei rekkje amerikanske universitet. Demonstrantane har sett opp teltleirar ved fleire campusar. Studentane som er med på aksjonen krev at Israel stoppar krigføringa i Gaza og at universiteta kuttar økonomiske bindingar til Israel.
Aksjonane har ført til valdelege samanstøyt mellom studentar og politi fleire stader, og over 1000 demonstrantar har blitt arresterte, melde CNN 1. mai.
Eit av universiteta som har stått i sentrum for demonstrasjonane er Columbia-universitetet i New York. Universitetet stenger no ute studentar som ikkje forlèt området frivillig. Dei risikerer òg å miste studieplassen og ikkje få ta eksamen. På grunn av demonstrasjonane har universitetet førelesingar på nett, fordi det ikkje er mogleg å kome inn på campus, skriv VG. Politiet arresterte onsdag 300 personar ved universitetet.
Ved UCLA i California var det onsdag slåstkamp mellom pro-israelske og pro-palestinske studentar. Universitetsleiinga var i starten opne for demonstrasjonane, men seier etter samanstøytane at dei bryt med retningslinjene til universitetet.
I Noreg har studentar latt seg inspirere av USA og sett opp ein teltleir ved Universitetet i Oslo. Dei krev akademisk boikott av Israel. I motsetnad til opptøyane i USA har denne teltleiren vore heilt fredeleg.
Demonstrasjonar mot «utanlandsk agent»-lov i Georgia
Onsdag stemde parlamentet i Georgia for ei lov som krev at selskap og organisasjonar med over 20 prosent av finansieringa frå utlandet, må registrere seg og oppgi bindingane.
Lova har blitt kalla både «Russland-lova» og «utanlandsk agent»-lova. Opposisjonen i landet meiner regjeringa samarbeider for tett med Russland, skriv NTB. Russland har allereie ei liknadene lov som dei brukar til å kneble vestlegstøtta medium og organisasjonar, skriv nyheitsbyrået.
Mange har demonstrert mot lova, og rundt 40 000 personar samla seg i hovudstaden Tbilisi onsdag kveld. Politiet brukte tåregass og sjokkgranatar mot demonstrantane utanfor nasjonalforsamlinga. 11 personar blei skadde, blant dei seks politifolk. 63 er arresterte av politiet.
Georgia har søkt om å bli medlem i både Nato og EU. Sistnemnde har åtvara om at «utanlandsk agent»-lova kan få følgjer for søknaden, og EU-presidenten fordømmer valdsbruken mot demonstrantane.
Regjeringa i Georgia ønskjer å innføre lova i midten av mai.
Hetebølgje i Asia
Fleire asiatiske land har dei siste vekene vore råka av ei hetebølgje. I Bangladesh har dei stengt skular på grunn av ekstremvarmen. Det er 76 år sidan sist det vart målt like høge temperaturar i Bangladesh i april.
– I år har hetebølgja dekt 80 prosent av landet. Vi har ikkje sett eit slikt utbrot og omfattande hetebølgje før, seier statsmeteorolog Muhammad Abul Kalam Mallik ifølgje NTB.
På Filippinane vart 7000 skular stengde onsdag på grunn av hetebølgja.
Førre veke åtvara styresmaktene i den thailandske hovudstaden Bangkok om at det ville vere «ekstremt farleg» å vere utandørs. Temperaturen var då 39 gradar, men det kjennest ut som 52 gradar på grunn av den høge luftfukta.
Politiet tek grep i møte med valdsbølgje i Oslo
Politiet er uroa for det som har blitt omtalt som ei valdsbølgje i Oslo. I fjor var det 64 episodar med skot eller knivstikking i Oslo, viser ei oppteljing gjort av NRK. Det var ein auke frå 39 slike episodar året før.
Så langt i år har det vore 15 tilfelle av skot og knivstikkingar i hovudstaden. Den siste av desse fann stad ved Nationaltheatret t-banestasjon onsdag 1. mai, der ein person ifølgje VG vart lettare skadd.
Brorparten av desse valdshendingane har funne stad i sentrum og bydelane Gamle Oslo og Grünerløkka. Aller flest hendingar var det rundt Grønland, Tøyen og Vaterlandspassasjen.
Regjeringa har varsla 635 milliardar ekstra til politiet i revidert budsjett. Noko av dette skal brukast for å styrke innsatsen på Grønland og Tøyen.
– Reint praktisk vil det seie 38 dedikerte tenestepersonar som skal jobbe der over tid, både dag og natt, seier einingsleiar for eining sentrum i oslopolitiet, Frode Larsen, til NRK.no.
Aktivist dømt til 11 år i fengsel i Saudi-Arabia
Saudiarabiske Manahel al-Otaibi (29) er i dømt til 11 års fengsel, skriv VG.
The Guardian melder denne veka at aktivisten skal ha blitt dømt i hemmelegheit av landets terrordomstolar. Styresmaktene stadfestar overfor FNs høgkommisær for menneskerettar at ho 9. januar vart dømt for såkalla «terrorhandlingar».
Bloggaren og fitness-instruktøren har vore fengsla sidan 2022. Ifølgje Amnesty International er al-Otaibi fengsla på grunn av kleda hennar, at ho har støtta kvinners rettar i sosiale medium og fordi ho har tatt til orde for å avskaffe verjesystemet i landet, som krev at kvinner må ha løyve frå ei mannleg verje til diverse ting.
Saudi-Arabia har dei siste åra innført reformer som skal gi kvinner fleire rettar, men Amnesty meiner dommen avslører at reformene er hole. Dei krev at ho blir sleppt fri umiddelbart.
Lyspunkt: Metodistkyrkja opnar for likekjønna ekteskap
Onsdag skrota trussamfunnet forbodet dei har hatt mot likekjønna ekteskap og homofile prestar, skriv NTB. Trussamfunnet har om lag 10 millionar medlemmer på verdsbasis, og rundt halvparten av desse er i USA.
– Dette er fantastisk! Og ein dag vi har drøymt om og venta på i mange år, fortel Audun Westad til Vårt Land. Han var ein av to norske delegatar som var til stades på kyrkjekonferansen i Nord-Carolina i USA, der endringa vart stemt fram med 692 mot 51 stemmer.