Litteraturpris til roman om tenåringspappa
Forfattaren Taran L. Bjørnstad stakk av med Kulturdepartementets litteraturpris då departementet delte ut prisar for barne- og ungdomslitteratur tysdag.
Bjørnstad vann prisen for ungdomsromanen «Uke 40» om den 17 år gamle Even som snart er russ, og ivrig klatrar – til han forelskar seg i Iben og noko langt frå planlagt skjer.
– Det handlar om ei altoppslukande forelsking, vennskap, psykisk sjukdom, tilsynelatande umoglege val og det å ta konsekvensane av eigne handlingar, ifølgje juryen.
I grunngivinga si karakteriserer dei romanen som velskriven, dialogdriven og med munnleg og truverdig språk.
– Taran L. Bjørnstad meistrar kunsten å byggje opp ei nærast filmatisk forteljing som driv oss vidare medan vi lurer intenst på kva vegval Even endar opp med å gjere. Vil han halde på dei opphavlege planane, eller vil han la eit lite barn snu alt på hovudet? skriv juryen vidare.
Den eine hendinga
Taran L. Bjørnstad har late seg inspirere av den unge vaksentida, som er full av pregingsepisodar og store val. I vår del av verda opplever vi sjeldnare at noko heilt ukontrollert «slår ned» i livet vårt og endrar kursen i livet.
– Vi kan ofte planleggje og svinge utanom det vanskelege. Men her er det ingen veg utanom. Eit lite menneske er på veg, og nokon må ta seg av det. For Even er det ein ekstremsituasjon. Han kjenner at valet står mellom han sjølv og barnet, sa forfattaren til NTB då boka kom i fjor.
Bjørnstad snakka med barnevernsvakta, snusa på nyfødde babyar på Rikshospitalet og intervjua ein tenåringspappa i førebuingane sine til å skrive boka.
No har boka resultert i den gjæve prisen.
28 nominerte
Til saman var 28 forfattarar, illustratørar, teikneserieskaparar og omsetjarar nominerte i sju priskategoriar til dei høgthengande prisane frå Kulturdepartementet.
Forutan litteraturprisen vart det delt ut fagbokpris, biletbokpris, debutantpris, illustrasjonspris, omsetjarpris og teikneseriepris. Utdelinga fann stad på Nasjonalbiblioteket i Oslo, der kultur- og likestillingsminister Lubna Jaffery (Ap) stod for utdelinga.
Biletbokprisen for 2023 gjekk til Mariko Miyata-Jancey og illustratør Marianne Gretteberg Engedal for «Mieko danser», medan fagbokprisen for 2023 gjekk til Ragnhild Holmås og illustratør Henriette T. Osnes for «Ordenes hårreisende hemmeligheter».
Teikneserieprisen for 2023 gjekk til Kjersti Synneva Moen for «Grip den føkkings dagen». Historia hennar om Amalie, som flyttar frå heimbygda for å gå kunstlinja på vidaregåande, gav henne Pondusprisen i fjor.
Debutantprisen for 2023 gjekk til Heidi Marie Vestrheim for «Jenny Fender», medan Esther van Hülsen vatn illustratørprisen for teikningane sine til boka «Det ville Norge» av Ole Mathismoen.
Fartein Døvle Jonassen vann omsetjarprisen for 2023 for omsetjinga frå engelsk av «Familien Swift» av Beth Lincoln.
