Cricket kan bli OL-øving i 2028
Dei olympiske leikane i Los Angeles i 2028 kan få fem nye idrettar.
Arrangørane til OL i 2028 har sagt at dei ønsker å inkludera cricket, flaggfotball (ein slags mildare variant av amerikansk fotball), lacrosse, squash og baseball/softball på programmet.
Forslaget skal vurderast av den internasjonale OL-komiteen (IOC) i haust.
Squash, lacrosse og flaggfotball har aldri før vore greiner i OL. Cricket var inkludert i tevlinga éin gong – i år 1900. Baseball har vore med ei rekke år, men vart utelaten i OL i Paris i 2024.
– Oppglødde
Det internasjonale cricketforbundet (ICC) gler seg over avgjerda frå arrangørane i Los Angeles.
– Vi er oppglødde over at LA28 har føreslått å inkludera cricket i OL. Sjølv om dette ikkje er den endelege slutninga, er det eit veldig tydeleg landemerke på vegen mot å sjå cricket i OL for første gong på meir enn hundre år, seier ICC-leiar Greg Barclay i ei pressemelding.
Utviklinga skjer medan verdsmeisterskapet i cricket vert arrangert i India 5. oktober til 19. november.
Cricket har sitt opphav i søraust-England, og sporten vart spreidd i lag med utvidinga av det britiske imperiet. Han er særleg populær i Sør-Asia, sørlege Afrika og Oseania. Australia har hatt størst suksess i internasjonale cricket-tevlingar.
Kor mykje hugsar du frå sportsåret 2022? Test kunnskapane dine i denne quizen!
Foto: kremlin.ru, CC BY 4.0, Wikimedia Commons / Wenflou – Eige verk, CC0, Wikimedia Commons / Werner100359 – Eige verk, CC BY-SA 4.0, Wikimedia Commons / si.robi/ CC BY-SA 2.0, Wikimedia Commons / Andreaze – Eige verk, CC BY-SA 4.0, Wikimedia Commons / Morio – Eige verk, CC BY-SA 4.0, Wikimedia Commons
