Ti år gammalt stjerneskot skal spela på Tysnesfest
Denne artikkelen er eldre enn 1 år gamal. Det betyr at noko av informasjonen kan vere utdatert.
Saka er henta med velvilje frå Bladet Tysnes.
Jonas Hansen (10), også kjend som DJ Axillar, skal spela mellom AURORA og Matoma, fredag 12. juli. Dette skriv Tysnesfest i ei pressemelding.
I fjor sende managementet til Alan Walker ein e-post til festivalen, om at dei hadde sett opp eit backstage-møte mellom Walker og den unge DJ-en. I år er det altså sistnemnde som får stå fremst på scenen.
– Me har òg sett fleire videoar der Jonas trer inn i rolla som DJ Axillar, og me må seia me er svært imponerte! skriv festivalen i pressemeldinga.
Les også: Kvar er dei kvinnelege musikkprodusentane?
– Han digga ideen
På det biletdelingsmediet Instagram har det unge stjerneskotet over 7.500 følgjarar; blant desse er Matoma, som skal spela etter DJ Axillar under Tysnesfest.
– Me snakka med Matoma tidlegare i vinter og spurde han om kva han tenkte om at me vurderte å gi DJ Axillar speletid. Han digga ideen, skriv Tysnesfest.
Mixar songane live
– Eg synest han er dritflink. Som far hans seier, han mixar songane live. Han har ikkje noko ferdigmixa. Det er ikkje mange DJ-ar som gjer det, seier dagleg leiar i Tysnesfest, Øystein Vaage, til «Tysnes».
– Kva tenkjer du om å gi ein så ung musikar ein slik sjanse?
– Eg synest det er veldig gøy å kunna gjera det. Eg trur at me gir han ein stor sjanse no, seier Vaage, som trur å spela på Tysnesfest vil vera bra for karrieren til den unge DJ-en.
Vaage kan òg fortelja om gode prognosar for sjølve festivalen i år:
– Billettsalet går godt. Me ligg langt framfor det me gjorde i fjor på denne tida. Me ligg nesten på 2017-tal; det var rekordåret vårt, seier han.
DJ Axillar er allereie godt i gang med førebuingane:
