Carl Frode Tiller festspeldiktar på Dei nynorske festspela
Forfattaren Carl Frode Tiller blir med som festspeldiktar på Dei nynorske festspela i Ørsta og Volda i 2019.
Denne artikkelen er eldre enn 1 år gamal. Det betyr at noko av informasjonen kan vere utdatert.
Forfattarskapen til namdalingen kjem til å prege programmet på festspela 13. til 16. juni både direkte og indirekte, lover arrangøren. Temaet blir «Forteljingar».
– Carl Frode Tiller er ei av dei sterkaste stemmene i norsk litteratur, ei av dei som viser oss kva menneskesinnet kan romme. Vi ser fram til å løfte fram fleire sider av forfattarskapen hans for publikum, seier dagleg leiar Gaute Øvereng i Dei norske festspela.
Les også: Ny publikumsrekord for Dei nynorske festspela
Ein takk til nynorsken
Tiller er den første festspeldiktaren frå Trøndelag, og har er både stolt og glad for oppdraget.
– Eg har så mykje å takke nynorsken for. Han gav meg sjansen til å bruke trønderdialekten min i det eg skriv, og hadde det ikkje vore for det, veit eg ikkje om eg hadde vore forfattar i dag. Eg hadde iallfall vore ein dårlegare forfattar, seier Tiller.
Tiller debuterte med romanen «Skråninga» i 2001 og har etter den tid skrive fem romanar og tre teaterstykke. Han har fått mange prisar for forfattarskapen sin, mellom anna Tarjei Vesaas’ debutantpris for «Skråninga» og både Brageprisen, Kritikarprisen, Sult-prisen og EUs litteraturpris for romanen «Innsirkling» (2007).
I år er Tiller nominert til Nordisk råds litteraturpris for romanen «Begynnelser» (2017).
Les også: Nynorsk kultursentrum feirer 25 år
