Det handlar om å dele
Denne artikkelen er eldre enn 1 år gamal. Det betyr at noko av informasjonen kan vere utdatert.
På Jåttå fyller dei wikien med fagstoff som kan brukast av både vaksne og ungdommar, og Brueland opplever at skulewikien blir meir brukt enn læringsplattforma It’s learning.
– Fordelen med ein wiki er at materialet blir liggande der heile tida. Det forsvinn ikkje når ein klasse sluttar, slik det gjer på It’s learning.
– Kven er det som lagar wikien dykkar?
– Vi er tre lærarar som har jobba med dette i eitt år no. Så langt har vi fått lagt ut studieførebuande VG2 og VG3 sitt fagstoff.
Og meir er på veg. Norsklæraren, som også har IKT-pedagogansvar, seier ein annan fordel med ein wiki er at den er enkel å redigere og fylle på.
– Verktøy av denne typen gjer det enkelt å dele tekst og bilde mellom mange og gjer at vi kan samarbeide meir effektivt.
Elevane lagar også sine eigne wikiar, men dei er ikkje gjenstand for same kvalitetssikring som skulewikien.
– Alle lærarane er ikkje involverte?
– Nei, det er nok slik at ikkje alle kjenner at dei kan med dette. Men det er ein fin måte å heve ikt-kompetansen sin på, så eg vil gjerne tilrå det, seier Frode Brueland ved Jåttå videregående skule.
Ei ny undersøking viser at ni av 10 lærarar er interesserte i å bruke digitale læremiddel i undervisninga. Undersøkinga er gjort på oppdrag frå Den norske Forleggerforening, Elevorganisasjonen, Norsk faglitterær forfatter- og oversetterforening og Utdanningsforbundet. Her kjem det fram at lærarane ser digitale læremiddel som eit tillegg til lærebøker, og at dei færraste trur lærebøker vil bli heilt digitale i framtida.
Til wikien: http://norskjaattaa.wikispaces.com/
