Det best besøkte arrangementet var konserten med Stein Torleif Bjella, som 344 publikummarar gjekk på. Dei samla besøkstala på 4044 er under budsjettet til festivalen, skriv Nynorsk kultursentrum i ei pressemelding.

Dagleg leiar på Aasen-tunet, Gaute Øvereng, meiner årsaken til dei låge tala er dårleg vêr og færre arrangement enn tidlegare.

– Neste år flyttar me Festspela til tidlegare i juni, og då er det også naturleg å sjå om me kan gjere fleire ting på nye måtar, seier han om festivalen som vart arrangert for 26. gong.

Tek med seg inntrykka

Festspeldiktaren i år var barne- og ungdomsforfattar Lars Mæhle, som reiser heim med gode minne.

– Eg vil alltid ha med meg bilde og inntrykk herifrå, frydefulle barneblikk, gode samtalar, musikk, ord og gode ansikt, seier Mæhle.

LES INTERVJUET MED FESTSPELDIKTAREN HER

I alt arrangerte Festspela 48 arrangement i Aasen-tunet og i vertskommunane Ørsta og Volda, og festivalen har budsjett på 2,2 millionar kroner.

Ei nyvinning i år, er at festpela strøyma nokre arrangement på internett. Det gjer at det framleis er mogleg å få med seg nokre av arrangementa.