Koding blir valfag på 146 skular

– Programmering blir ein stadig viktigare ferdigheit, og me legg no til rette for at fleire kan læra å koda allereie på ungdomsskulen, seier kunnskapsminister Torbjørn Røe Isaksen.

Pilotprosjektet med programmering som valfag startar skuleåret 2016-2017, og varer til og med skuleåret 2018-2019. 146 skular fordelt på 53 kommunar får delta i forsøket.

– Det er flott at så mange skular og kommunar ønskjer å verta med i utprøvinga av det nye valfaget. Dette viser at interessa for programmering er stor ute på skulane, og ikkje minst blant lærarane, seier kunnskapsministeren.

LES OGSÅ: Bør kidsa kode på skulen?

Laga robotar
I det nye valfaget skal elevane blant anna læra korleis datamaskiner og ulike dataprogram fungerer. Dei skal òg få opplæring i programmeringsspråk og bruksområda deira. Døme på oppgåver elevane kan få er å programmera eigenutvikla robotar, og å laga enkle dataprogram eller animasjonar.

– Å læra å koda gir elevane nye metodar for problemløysing, og høve til å jobba kreativt. Å ta koding, spelprogrammering og 3D-design inn i skulen kan gjera faga meir relevante og motiverande, seier Røe Isaksen.

Lærarane på skulane som deltek i forsøket får gode høve til å auka dei teknologiske kunnskapane sine. Senter for IKT i utdanninga har utvikla eit nettbasert kurs i programmering for lærarar.

LES OGSÅ: Her lagar elevane Lego-robotar

Godt høve for utvikling
Akershus og Hordaland har flest skular med i prosjektet.

Rektor Hans Arnevik ved Bremnes ungdomsskule i Bømlo i Hordaland, seier til Framtida.no at han er glad for at skulen får vera med.

– Fleire seier det vil bli meir bruk for koding framover. Sånn sett er dette ein god start for oss. Eg ser gode høve for å utvikla oss på skulen, seier han og understrekar at dei i dag ikkje har lærarar som har kompetanse på koding og at det difor er nødvendig med kurs.

Sjå kva skular som får delta i prosjektet med koding som valfag!