242 bibliotekprosjekt får støtte

Nasjonalbiblioteket har løyvd 24,5 millionar kroner til aktivitetar i biblioteka og utvikling av biblioteka som møteplassar. Til saman 242 prosjekt er støtta med mellom 15 000 og 2 millionar kroner. Det skriv Nasjonalbiblioteket sjølv i ei pressemelding.

– For oss har det vore viktig at så mange kommunar som mogleg får starta utviklingsprosessen vi initierte med den nasjonale bibliotekstrategien. Difor har svært mange prosjekt fått støtte, sjølv om ikkje alle har fått like mykje som dei søkte om i denne runden. Tilsvarande midlar vil løyvast kvart år i heile strategiperioden, og dei neste fire åra skal alle norske folkebibliotek få høvet til å utvikla seg som arrangørar, lærings- og debattarenaer, seier Nasjonalbibliotekets direktør Aslak Sira Myhre i pressemeldinga.

LES OGSÅ: Vil skapa pulserande litteraturhus over heile landet

For å stimulera til vidare utvikling, prioriterte Nasjonalbiblioteket i denne tildelingsrunden prosjekt knytt til tilrettelegging i biblioteklokala. Størstedelen av dei til saman 77 millionar kronene det var søkt om, var knytt til nettopp denne typen prosjekt.

Sjå kva kommunar som får støtte!