Rekordmange asylsøkjarar til Sverige
Denne artikkelen er eldre enn 1 år gamal. Det betyr at noko av informasjonen kan vere utdatert.
Rekordmange asylsøkjarar
Hittil i år har meir enn 74.000 menneske søkt asyl i Sverige, noko som betyr at det mest sannsynleg vil komme fleire enn dei 84.000 asylsøkjarane som kom under Balkan-krigen i 1992.
Dei fleste som har søkt asyl i Sverige er syrarar og afghanarar. For det meste er det mindreårige utan foreldre som har komme. I september aleine søkte over 24.000 menneske asyl i Sverige, meir enn dobbelt så mange som i august.
LES OGSÅ: Nynorsk for vaksne innvandrarar
Ikkje førebudde
Analytikar Helena Carlestam i det svenske Migrationsverket seier at landet var førebudd på den vanlege auken i talet på asylsøkjarar som er normalt i sommarmånadene.
– Men vi var ikkje førebudde på denne skredliknande auken, seier ho.
Leiar for det svenske Migrationsverket, Anders Danielsson, sa til Dagens Nyheter for rundt ein månad sidan at det er forventa i overkant av 90.000 asylsøkjarar til landet i år.
Sverige har ei befolkning på 9,8 millionar menneske, og tok imot 81.000 asylsøkjarar i fjor.
