70 år sidan jubeldagen i 1945
70 år er gått sidan Tyskland kapitulerte og Noreg og andre okkuperte land kunne sleppe jubelen laus. Det blir markert landet rundt.
Denne artikkelen er eldre enn 1 år gamal. Det betyr at noko av informasjonen kan vere utdatert.
Nyheita om frigjeringa tikka ut på NTB-linja alt om kvelden 7. mai 1945, der bodskapen var «Vår kamp er kronet med seier. Norge er atter fritt».
Først dagen etter underteikna generalfeltmarskalk Wilhelm Keitel, som var øvstkommanderande for dei tyske styrkane, ein vilkårslaus kapitulasjon i Berlin.
Gledesscenane som følgde i Noreg og andre okkuperte land, lèt seg knapt beskrive.
LES OGSÅ: Er framleis på slagmarka kvar dag
Kransenedleggingar
70 år etter den tyske kapitulasjonen og frigjeringa, blir dagen markert over heile landet. Hovudmarkeringa blir på Akershus festning i Oslo, der kong Harald legg ned krans og held tale ved Nasjonalmonumentet kl. 16.
Statsminister Erna Solberg skal også halde tale på Akershus og blir flankert av forsvarsminister Ine Eriksen Søreide, forsvarssjef Haakon Bruun-Hanssen og kulturminister Thorhild Widvey.
Utanriksminister Børge Brende deltek under markeringa ved Krigsseglarmonumentet på Bygdøy, og i Universitetsaulaen blir det halde minnekonsert for offera for nazismen.
Kronprinsen til Bergen
Kronprins Haakon deltek under markeringa i Bergen, der han skal leggje ned krans ved brygga til Shetlands-Larsen. Næringsminister Monica Mæland også er til stades der.
Fleire andre statsrådar deltek på tilsvarande markeringar landet rundt, for å minnast dei falne og hylle dei over 100.000 nordmennene som i åra sidan har delteke i utanlandsoperasjonar for Noreg.
LES OGSÅ: Satsar på maratonteater om natta
Krigsseglarane
I Trondheim skal dagen markerast både ved Krigsseglarmonumentet, Kristiansten festning og i Nidarosdomen, før olje- og energiminister Tord Lien rundar det heile av i Domkyrkjegarden.
Arbeids- og sosialminister Robert Eriksson er på plass ved Forsvarets veteransenter på Kongsvinger, der han blant anna skal leggje ned krans ved UNIFIL-monumentet, medan kunnskapsminister Torbjørn Røe Isaksen deltek under markeringa på Rjukan i heimfylket Telemark.
Nord-Noreg
Kommunal- og moderniseringsminister Jan Tore Sanner er på plass i Bodø, medan fiskeriminister Elisabeth Aspaker deltek under markeringa i Narvik.
Helse- og omsorgsminister Bent Høie markerer dagen i Tromsø, medan miljøvernminister Tine Sundtoft er i Troms, der ho skal innom både Sørreisa, Setermoen, Bardufoss og Finnsnes.
Lokale arrangement
Barne-, likestillings- og inkluderingsminister Solveig Horne er på plass i Vatneleiren i Sandnes, medan samferdselsminister Ketil Solvik-Olsen deltar under seremoniar både i Åmot i Østerdalen og på Elverum. På Jørstadmoen i Lillehammer er europaminister Vidar Helgesen på plass.
I tillegg blir det markeringar i ei rad kommunar landet over, der krigsheltar blir hylla og frigjeringa markert med ulike tilstellingar.
Ved Asker kyrkje skal det leggjast ned blomar ved grava til Max Manus, og dagen skal også markerast ved den gamle fangeleiren på Grini i Oslo.
Dei 100.000 russiske krigsfangane som sat i nærare 500 leirar i Noreg skal også minnast fleire stader, og det same skal dei 72 mennene frå Telavåg som vart sende til Sachsenhausen konsentrasjonsleir der 31 av dei døydde. (©NPK)
LES OGSÅ: – Eg blei ikkje redd. Eg blei trassig
Faktaboks
Fakta om frigjeringa av Noreg i 1945
* 8. mai 1945 tredde kapitulasjonen til dei attverande tyske militære styrkane i kraft.
* Kapitulasjonen vart underskriven 7. mai i Reims, og deretter, etter krav frå Sovjetunionen, igjen i Berlin 8. mai, 9. mai Moskva-tid.
* Kapitulasjonen omfatta dei 365.000 tyske soldatane i Noreg, som hadde vore okkupert av Tyskland sidan 1940.
* Kapitulasjonsvedtaka trådde i først i kraft i Noreg ved midnatt mellom 8. og 9. mai, men feiringa begynte alt då nyheita vart kjent om kvelden 7. mai, og heldt fram gjennom heile 8. og 9. mai.
* Det var frykt for at element på tysk side i Noreg og i NS skulle forsøkje å fortsetje kampen. Den tyske hæren var likevel lojal mot den tyske regjeringa til Karl Dönitz.
* Rikskommissær Josef Terboven vart avsett av Dönitz 7. mai, og tok sitt eige liv ein halvtime før kapitulasjonen tredde i kraft.
* Ministerpresident Vidkun Quisling vart arrestert om morgonen 9. mai, då han melde seg på Oslos hovudpolitistasjon i Møllergata 19.
* Leiinga i Heimefronten overtok styringa fram til ein regjeringsdelegasjon leidd av kronprins Olav kom til Oslo 13. mai.
* Frigjeringsdagen 8. mai er sidan 1962 offisiell flaggdag i Noreg.
(Kjelde: Store norske leksikon) (©NPK)
