Hemmeleg forfattar på salstoppen
Samlaget toppar salslista for første gong på seks år med «Mi briljante venninne». Men dei anar ikkje kven forfattaren er.
Denne artikkelen er eldre enn 1 år gamal. Det betyr at noko av informasjonen kan vere utdatert.
Hemmeleg forfattar på topp
Elena Ferrante-feberen har kome til Noreg. Men forfattarnamnet er berre eit pseudonym og berre det italienske forlaget veit kven som skjuler seg bak namnet.
«Mi briljante venninne» er første band i den mykje omtalte Napoli-kvartetten som handlar om venninnene Elena og Lila som veks opp i Napoli etter 2. verdskrig.
Romanen sel no meir i Norge enn bøkene til dei største krimforfattarane.
Bokmeldaren til Framtida.no gav boka ein seksar, og skreiv at romanen «sit fast i deg, og slepp ikkje taket».
Band II i Napoli-kvartetten, «Historia om det nye namnet» kjem på norsk i oktober.
– Ferrantes Napoli-kvartett er moderne romankunst på sitt beste. At «Mi briljante venninne» ligg på salstoppen seier det meste om norske lesarar, seier administrerande direktør i Samlaget, Edmund Austigard i ei pressemelding.
Boka har no eit opplag på 25.000 eksemplar.
Ifølgje marknadssjef Anne Liv Tresselt må ein tilbake til 2009 og «Lykka er ein sjeldan fugl» av Anna Gavalda for å finna sist gong ein roman frå Samlaget toppa bestseljarlista i Noreg.
