Til London med Feelgood-spegel

Framtida
Publisert
Oppdatert 24.05.2017 15:05

info

Denne artikkelen er eldre enn 1 år gamal. Det betyr at noko av informasjonen kan vere utdatert.

Denne får deg til å kjenne deg flott

Denne veka er Sandra Isabell Aasen frå Ulsteinvik i London på utstillinga «100 % Norway».

Ho studerer møbel og romdesign/interiørarkitektur ved Kunsthøgskolen i Bergen. Der går ho på tredje året, deretter skal ho ta mastergrad.

– Konseptet med spegelen Feelgood er at det er ein spegel som skal få deg til å kjenne deg best mogleg, forklarer designstudenten. Spegelen kan roterast 360 gradar og har lys som gjer at du kan styre skuggane.

LES OGSÅ: Kreativ problemløysar 

Du kan leike med lyset
Spegelen er laga av valnøtt, stål, ei spegelflate og to 3D-printa lystrekantar med akrylfront. Det store lyset er litt sterkare enn det vesle, forklarer Aasen. Spegelen er litt vinkla for å ta vekk fokuset frå haka.

Når du speglar deg i denne spegelen kan du leike med lyset og skuggane for å finne det beste lyset til ditt ansikt. Aasen har kalla spegelen for FeelGood.

Oppgåva studentane fekk var å tenkje over morgonane sine. Då oppdaga Aasen at dårleg lys på badet gjorde det vanskeleg å sminke seg fint. Då fann ho opp denne spegelen med integrert lys. Spegelen kan henge både på bad og gang. Han er fin i seg sjølv, samstundes som han er ein bruksgjenstand.

Utstillinga i London heng til og med sundag.

Saka var først publisert i Vikebladet.