Færre brev i Posten
Posten går 95 millionar kroner i minus i andre kvartal. Grunnen er færre brev og meir konkurranse.
Denne artikkelen er eldre enn 1 år gamal. Det betyr at noko av informasjonen kan vere utdatert.
Posten tapar pengar
Posten hadde eit resultat før skatt i andre kvartal på minus 95 millionar kroner, mot minus 278 millionar kroner i same periode året før. Den største utfordringa er at færre sender brev.
LES OGSÅ: Laurdagsposten viktig i distrikta
Fleire pakkar
Samtidig fraktar Posten meir pakker og gods, blant anna som eit resultat av auka handel via internett. Driftsinntektene auka i perioden frå 5,6 milliardar kroner til 5,8 milliardar kroner.
I ein kommentar til resultatet seier konsernsjef Dag Mejdell at det framleis er fall i mengda brev og ein sterk konkurranse i logistikkmarknaden.
– Talet på brev har falle med nærare 40 prosent sidan 2000. Den digitale utviklinga gjer at kundevanane endrar seg raskt i vår bransje, seier konsernsjefen.
LES OGSÅ: Stel frå postkassane
Mindre brev, aviser og reklame
I første halvår fall mengda brev 6 prosent samanlikna med same periode i fjor. Brev frå bank, forsikring og avisene står for den største nedgangen i år, men også tala for aviser og uadressert reklame gjekk ned.
