Funnybox Production er namnet på elevbedrifta frå Kaupanger som går nye vegar.

Eirik Thue, Sogn Avis
Eirik Thue, Sogn Avis

Simen Romstad, Lars Dalaker og Magnus Førde har skrive manus, laga musikk, filma, og redigert. No sel dei ein spelfilm på 45 minuttar.

Oppfølgjar

Dei tre kreative karane gav i 6. klasse ut to filmar: Danse­feber 1 og Dansefeber 2.

– Dei ligg begge på YouTube, forklarar dei.

No har dei lansert Danse­feber 3.

– Den er mykje betre enn dei to første filmane, og me har lagt ned mykje arbeid for å få alt på plass, fortel dei.

Dei karakteriserer den siste filmen som ein humorfilm.

Trailer

– Me har brukt elevar på skulen som statistar. Det er lurt, for då kjøper dei og familiane deira filmen, smiler dei. På messa i Vik selde dei filmen for 100 kroner per stykk.

Dei visste også at dei kan meir enn å laga film. Marknadsføring er minst like viktig og dei synte fram traileren til filmen sin til eit imponert publikum. Dei hadde også på plass ein QR-kode, som du kan skanna med ein smarttelefon og på den måten få traileren rett inn på telefonen.

– Me har også ein banner her for filmen, der sponsorane blir trekt fram. Me har fått 2.000 kroner i sponsorstøtte og det er me glade for, seier trioen, som skal bruka overskotet frå filmproduksjonen til klassetur til Polen.

Les siste filmnytt her!

Vann

Funnybox Productions vart under messa i Vik kåra til vinnar i klassen «Nyskaping og kreativitet». Juryen grunngjev dette med følgjande: «Heilt ny idé og svært kreative gutar. Dei gjorde alt sjølve, frå idé til manus, regi, filming/produksjon, hadde hovudrollene sjølv, skaffa sponsorar, og marknadsføringsmateriell, laga trailer til filmen sin, ein kunne få tilgang til ved å skanna QR-kode. Og – dei hadde lagt ned ein enorm stor eigeninnsats i bedrifta».

Les saka i Sogn Avis!

Oppdatert: onsdag 24. mai 2017 15.44

LES OGSÅ

ANNONSE