Forsking: – Økologisk jordbruk ikkje meir miljøvennleg

Framtida
Publisert
Oppdatert 24.05.2017 16:05

info

Denne artikkelen er eldre enn 1 år gamal. Det betyr at noko av informasjonen kan vere utdatert.

– Økologisk ikkje meir miljøvennleg

Økologisk jordbruk er ikkje meir miljøvennleg enn det konvensjonelle jordbruket, slår ein ny svensk forskingsrapport fast.

I seks av ni matproduksjonar er økologisk jordbruk verken meir eller mindre miljøvennleg enn konvensjonelt, heiter det i rapporten frå Livsmedelverket, det svenske motstykket til Mattilsynet, ifølgje Nationen.

Dette gjeld frukt og bær, mjølk, storfekjøt, svinekjøt, egg og jordbruksvekstar.

I produksjonen av kyllingkjøt og grønsaker kjem konvensjonelt ut som meir miljøvennleg. Berre fisk og skaldyr blir produsert meir miljøvennleg med den økologiske metoden.

LES OGSÅ: No blir det fleire økobønder

– Rapporten kjem ikkje overraskande på meg, men han vil nok overraska mange andre, seier seniorforskar Arne Grønlund i NIBIO.

Han meiner økologiomgrepet blir brukt feil.

– I jordbruket blir det brukt om prosessen og metoden for å produsera mat etter bestemte retningslinjer. Det høyrest vakkert og naturleg ut for uutdanna menneske. Det er lett å få inntrykk av at dette er betre for miljøet, men det er ikkje tilfelle, seier han.

Stortingsrepresentant Karin Andersen (SV) meiner økologisk jordbruk er nødvendig.

LES OGSÅ: Økogrønsaker bra for gravide

– Matjorda skal produsera mat i all tid framover. Giftstoff kan lagrast i organismar, og sidan i maten, seier ho.

Øko-bonde Jostein Trøite, styreleiar i Oikos – Økologisk Norge, seier at han etter omlegginga fekk redusert bruken av giftstoff.

– Eg har minst like god produksjon i dag som då eg produserte konvensjonelt, seier han. (©NPK)

LES OGSÅ: Vil ha økologisk mat inn i statlege kjøken