Stolt sumarjobb

– Bur du her? Det spørsmålet får eg kvar einaste omvisning. Folk tykkjer det er fint her og lurer veldig på om eg trivst i bygda, seier Aurora Hellandsjø Lysne, som har sumarjobb som omvisar på Gamle Lærdalsøyri.  

– Det er jo dette eg kjem frå og det er ein fantastisk sumarjobb å få formidle noko som er viktig for meg, seier ho.

Knutepunkt i vest
Turistane Aurora guidar får oppleve trehus i pastell, hotell, gamle krambuer og Løyntnantsbrygga. Rusle i eit spesielt sentrum, eit gamalt knutepunkt mellom aust og vest, der 161 av husa er verna. 

– Det beste er når omvisinga vert som ein samtale. Elles må eg passe på at eg ikkje vert for ivrig når eg ruslar rundt og formidlar, seier Aurora.

Omvisingane på Gamle Lærdalsøyri er eit pilotprosjekt og gjev fleire ungdommar sumarjobb. Dei har sjølve vore med på å utvikle både ruta og manus.

– Vi får jo mange positive attendemeldingar. Og så er det ekstra stas å gje lærdølar aha-opplevingar. Det er til dømes mange som ikkje veit at gågata har den einaste lovlege reklamen for tobakk i landet. 

Lovleg. Denne reklamen for tobakk heng på ei krambu på Gamle Lærdalsøyri.

Handplukka
Aurora har aldri skrive nokon jobbsøknad, men har som 16-åring likevel jobba med både servering, vasking, i butikk og med gardsarbeid. Til jobben som omvisar vart ho handplukka.

– Folk kjenner til meg og spør om eg vil jobbe. Eg trur det er avgjerande for ungdom som vil ha sumarjobb å bruke nettverket sitt. Så må ein sjølvsagt gjere ein god innsats, slik at ein får nye tilbod, forklarar Aurora. Når ho ikkje er omvisar i sumar, jobbar ho heime på garden. Ho får berre ei veke med «skikkelig» ferie.

– Det er viktig å ikkje vera for kresen og eg trur det er lurt å prøve mange forskjellige jobbar. Det er både moro og ein lærer mykje, og så er det ikkje dumt å ha peiling på litt av kvart, seier Aurora. 

Spesielt. Med 161 verna hus er Gamle Lærdalsøyri noko Aurora Hellandsjø Lysne er stolt av.

Vil heimatt
–   Eg har hatt ein del «oi, det visste eg ikkje»-opplevingar i jobben og det er stas å lære nye ting om plassen eg kjem frå. Eg har nok vorte endå meir stolt av Lærdal ettar at eg byrja som omvisar, seier Aurora. 

Men også elles er heimbygda viktig, så når ho ikkje er på vidaregåande i Sogndal, reiser ho mykje heim til garden. Ynskjet er å busette seg i Lærdal, når ho har opplevd litt meir av verda. 

– Nokon tykkjer kanskje det ikkje skjer nok her, men det er eg ikkje heilt samd i. Det er dette som er heime og det er her eg kosar meg, avsluttar Aurora Hellandsjø Lysne.