Roald Dahl twerkar på nynorsk

I samband med 100-årsjubileet for Roald Dahl gjev SolumBokvennen Forlag ut Vemmelege vers  i ny nynorskdrakt.  

Gjendiktinga, som er gjort av Grethe Fatima Syéd, vert lansert til Roald Dahl (1916-1990) sin fødselsdag 13. september.

I etterordet skriv Syéd at ho har «prøvd å stikke eit sugerøyr ned i det mest innovative segmentet av språk vi har i samfunnet, det som endrar seg frå dag til dag og som truleg aldri nokon på noko tidspunkt har fullstendig oversyn over. Nemleg ungdomsspråket, slang, dagens lingo.»

– Ei gjendikting har alltid utfordringar
Framtida.no spør Syéd om kva som har vore utfordringa med å gjendikta boka til nynorsk:

– Det er så mykje som skal på plass. Innhaldet er no éin ting, men så er det forma, det vil seia rim og rytme, klang, språklege bilete og liknande, forklarar to til Framtida.no.

– Når det gjeld Vemmelege vers er det ei klar haldning i teksten. Boka består av attforteljingar av ei rekkje kjende eventyr. Men Dahl har vridd på det meste, slik at det berre er ei beingrind inst i det heile vi kjenner igjen. Utanpå det er det heile mykje slemmare.

LES OGSÅ: Bannlyser jente- og gutebøker

Fekk hjelp av borna
Dahl tok med mykje som var nytt i hans tid, då boka kom ut på engelsk i 1982.

– Me har dratt det enno eit steg framover gjennom historia, og når eg seier me, er det fordi eg har fått uunnverleg hjelp av ungane mine på 13, 15 og 22. Dei kan ungdomsspråk og slang som eg aldri så mykje som har høyrd om eingong. Som at Oskepott vil på disco, her omforma til twerking, at far til Snøkvit legg inn kontaktannonse i ein trykt publikasjon, her sjølvsagt gjort om til nettdating – og så vidare.

– Dahl er rimeleg frekk, både med menneske og dyr (Raudhette og ulven), vaksne og barn (Jack i bønnestengelen og mora), kongelege og vanlege folk (Snøkvit og dei sju dvergane. Dei er kanskje ikkje heilt vanlege, men det er det dei færraste som er). Men me har ikkje berre vore up to date, me har òg prøvd å leggje inn hint til eldre norsk kultur, som Peer Gynt, Per Spelmann og Ivar Medaas.

– Eg trur nokon kvar vil kjenne igjen sitat frå noko dei har høyrd eller lese om tidligare. Den aller største utfordringa har kanskje vore tanken på at både barn og vaksne skal ha glede av gjendiktinga. Om me har lukkast vil vise seg, seier Grethe Fatima Syéd.

Få nyhendebrev med siste boknytt her!