Hekta på VM? Slik blir dei neste åra
VM-feberen har herja i sommarvarmen, men det treng ikkje ende her. Anten du er gammal fan eller ny supporter, har du mykje å sjå fram til dei neste åra.
Om du har blitt biten av VM-basillen og er skuffa over at det no er over, kan du trøyste deg med at det ikkje er lenge til neste verdsmeisterskap.
Fotballfesten held fram neste år
Allereie neste år er det VM for kvinner i Brasil, frå 24. juni, med finalen 25. juli. Dei norske kvinnene kom på andreplass i gruppa i juni, og må kjempe seg til ein plass i VM gjennom playoff-rundar denne vinteren. Dei møter Romania 7. oktober, i den fyrste av to playoff-kampar.
Som 14. beste lag i verda kan vi håpe på kvalifisering og ei god plassering, etter åttedelsfinale i førre VM i 2023.
Neste VM for herrar
Neste VM for herrar er i 2030, og fyrste kampen er førebels sett til 8. juni om fire år. For å markere at det då er hundre år sidan turneringa begynte, skal nokre av opningskampane spelast i Uruguay, Argentina og Paraguay. Dei hadde viktige roller i verdas fyrste VM, i 1930.
Størsteparten av turneringa skal likevel spelast i Marokko, Portugal og Spania. Finalen ligg an til å gå av stabelen 21. juli.
Rekordmange land
Det har aldri vore fleire vertsnasjonar (seks), spreidd over så mange kontinent (tre). Det betyr òg at seks land allereie er kvalifisert, fordi vertsnasjonane automatisk blir kvalifisert til gruppespelet.
Det kan òg bli med fleire land enn nokon gong. Allereie i år sette VM ny rekord i antal deltakarar, med 48 land. No kan det bli så mange som 64. Fifa sin president Gianni Infantino har sagt at dei skal undersøke om det er mogleg å utvide antal land. Skulle det bli slik, ville det vere ei dobling frå 32-lagsformatet ein har nytta frå 1998–2022.
Og skulle du no framleis ønskje deg meir landslagsfotball, er det sjølvsagt EM for herrar i 2028, og for kvinner i 2029.
