Nyhende- og debattavisa for unge
13.-16. april blir Songkran feira i Thailand. Dette er ei nyttårsfeiring som blir markert med store gatefestar der born og vaksne dynkar kvarandre i vatn.
Denne saka vart først publisert av systeravisa vår, Framtida Junior.
Songkran betyr «å bevege seg» på thai – det offisielle språket i Thailand. Høgtida, som årleg blir feira over fleire dagar i april, markerer ein ny start.
Den viktigaste tradisjonen under høgtida er å sprute vatn på kvarandre med bøtter, vasspistolar og slangar. Vatnet symboliserer at ein vaskar bort det gamle året og startar på eit nytt.
Hovudstad: Bangkok
Innbyggjartal: 71,7 millionar
Songkran er også ei stor høgtid i dei asiatiske landa Laos og Kambodsja og blant mindre menneskegrupper i Kina.
HONG KONG: Songkran blir også feira av ein del menneske i Kina. Her ser vi at folk dynkar kvarandre i vatn i Hong Kong. Foto: Louise Delmotte / AP Photo / NTB
I tillegg til «vasskrig» blir Songkran markert med å vere saman med familien sin, gi gåver og besøke tempel.
Opphavleg er nemleg Songkran ei religiøs nyttårsfeiring innan buddhismen.
Sjølv om folk i Thailand feirer nyttår under den store folkefesten i april, blir det nye året offisielt rekna frå 1. januar, slik som i Noreg.
