Hundrevis av LHBTQ+-par gifta seg i storseremoni i Thailand
Statsministeren sende helsing til para som gifta seg i den store regnbogeseremonien.
Thailand er det første landet i Søraust-Asia som opnar for likekjønna ekteskap på lik linje med par av ulikt kjønn.
Den nye lova vart godkjent i fjor, og denne veka vart regelendringa feira og markert med ein stor ekteskapsseremoni.
Bangkok Pride arrangerte ein stor ekteskapsseremoni i kjøpesenteret Siam Paragon i hovudstaden Bangkok torsdag. Over 200 par var påmelde seremonien på førehand, ifølgje CNN.
I ei førehandsinnspelt videohelsing understreka statsminister Paetongtarn Shinawatra at alle har like rettar og lik verdi.
– Denne likestilte ekteskapslova markerer byrjinga på det thailandske samfunnet si auka bevisstheit på kjønnsmangfald, og omfamning av alle uavhengig av seksuell orientering, rase eller religion, sa ho.
Etter den nye lova får likekjønna par same rettar som andre ektepar, som inneber rett til adopsjon, arv og vera fullverdig pårørande.
Eit par som gifta seg i den store LHBTQ+-seremonien i Bangkok 23. januar 2025. Foto: AP Photo/Sakchai Lalit
