Færre truslar mot pride enn i fjor
PST seier til Aftenposten at dei framleis registrerer truslar mot pride, men talet er mindre enn i fjor.
– Det er registrert truslar som grensar opp mot det som er ulovleg, som å true med terror, fortel seniorrådgivar Eirik Veum i PST til avisa.
Men talet går nedover. Veum opplyser at PSTs inntrykk er at talet på pride-truslar er litt mindre enn i fjor.
Bodskapen blir støtta opp under av leiaren for felles eining for operative tenester i Oslo politidistrikt.
– Per no har ikkje politiet i Oslo motteke konkrete, alvorlege truslar, seier Martin Strand.
Han seier at dei ser færre truslar og hatefulle ytringar retta mot pride enn på same tidspunkt enn i fjor. Utviklinga gler dagleg leiar i Oslo pride, Dan Bjørke, som trur ein meir open og normalisert feiring er årsaka til færre truslar.
– Vi tek stadig steg mot å bli eit meir inkluderande samfunn, og fleire har lyst til å bli med på feiringa, seier Bjørke til Aftenposten.
