Kulturpris til Helge Torvund
Diktaren Helge Torvund fekk i dag Rogaland fylkes kulturpris for 2014, blant anna for å vera ein aktiv debattant.
Denne artikkelen er eldre enn 1 år gamal. Det betyr at noko av informasjonen kan vere utdatert.
Det melder Rogaland fylkeskommune sine eigne heimesider. Premien er ein statuett av John Th. Josefsen og 50.000 kroner. Torvund vart møtt med ståande applaus då han tok imot prisen.
– Torvund er ein kunstnar som ikkje isolerer seg mellom kvar gong han gir ut eit verk, men som deltek aktivt i samfunnsordskiftet. Så godt som kvar dag kan me sjå han sjå på sosiale media. Der deler han av eigne dikt, oppfordrar til å lesa andre sine verk og er raus med omverda, skriv fylkeskommunen på heimesida si.
LES OGSÅ: Det heiter ikkje selfie – no lenger.
Habil bassist
Torvund er og godt kjend under twitternamnet @2rvund, ein aktiv kvitrar.
– Han er jærbu, og har drive innanfor sitt kunstfelt sidan han debuterte i 1977. Føre det seier ryktet at han var ein habil bassist i band på Jæren, sa fylkesordførar Janne Johnsen under utdelinga.
Tidlegare har Torvund vunne fleire andre prisar, som Nynorsk litteraturpris, Samlagsprisen, Stavanger Aftenblads kulturpris. Han har gitt ut eller vore med i minst 43 utgjevingar sidan debuten, både som diktar og forfattar av barnebøker og sakprosa.
