Byt julegåvene i god tid
Vil du byte inn ei av julegåvene du fekk i år? Da bør du gjere det så raskt som råd, er rådet frå Forbrukarrådet.
Denne artikkelen er eldre enn 1 år gamal. Det betyr at noko av informasjonen kan vere utdatert.
Forbrukarrådet minner om at byteretten ikkje er ein lovfesta rett, men at dei fleste butikkane av sedvane lar folk byte julegåver i dagane etter jul.
– Be om å få byte med eit smil. Da går det som oftast greitt, seier kommunikasjonsrådgivar Martin Skaug Halsos i Forbrukarrådet. Butikkane avgjer sjølv om dei vil byte julegåver mot andre varer, og dermed set dei også bytefristen sjølve. Den kan variere frå ei veke til eit halvt år.
– Hovudregelen er at du bør byte så raskt som råd etter jul, seier Halsos. Om gåva er kjøpt i ein nettbutikk, er reglane litt strammare. Der gir lova fjorten dagars angrefrist. Den fristen har ofte gått ut på julaftan, men da har ein del nettbutikkar litt romslegare vilkår.
QUIZ: Kva kan du om jul?
Fleire råd frå Forbrukarrådet
– Byt i god tid
– Ta med gåva i originalemballasjen
– Ikkje bryt forseglinga på cd-plater og dataspel
– Be om tilgodelapp
