KrFU-leiaren vil gi 50.000 kroner til unge som giftar seg
Nordmenn giftar seg stadig seinare i livet. KrFU-leiar Ingrid Olina Hovland ønskjer å endre dette og foreslår å gi pengar til unge under 30 år for å gifte seg.
– Det er ein symbolsk sum som anerkjenner ekteskapet som den beste samlivsforma, seier Hovland om pengepremien på 50.000 kroner til VG.
Ifølgje 21-åringen kan ikkje sambuarskap og andre «uforpliktande» forhold måle seg med tryggleiken og rammene ekteskap gir. Derfor vil ho leggje til rette for at fleire kan «stifte familie i trygge og stabile samliv».
Hovland seier forslaget også handlar om fallande fødselstal i Noreg, og påpeikar at det no er fleire alderspensjonistar enn barn som får barnetrygd.
– Då meiner eg vi må tore å diskutere konkrete økonomiske insentiv som gjer det lettare å etablere familie tidlegare, seier ho.
Ordninga skal gjelde alle ekteskap, uavhengig av trussamfunn og legning, ifølgje Hovland.
AUF-leiar Gaute Skjervø meiner pengane bør brukast på andre ting, som å styrkje studentøkonomien og sørgje for at unge har råd til å eige eigen bustad.
– Dette er reelle hindringar for mange unge som ønskjer å få barn i dag, seier AUF-leiaren.
På 50 år har gjennomsnittsalderen ved første ekteskap auka med rundt ti år. I dag er den 37,1 år for kvinner og 39,7 år for menn.
