Larry feira 15 år som statsministerkatt
I løpet av åra i 10 Downing Street, har han budd med seks statsministrar.
Han eller ho som er statsminister i Storbritannia, bur på adressa 10 Downing Street i London. Den 15. februar 2011 adopterte David Cameron, som var statsminister då, den fire år gamle katten Larry for å hjelpe til med å fange mus i bustaden. Larry fekk tittelen «Chief Mouser», eller «sjefsmusejeger».
Søndag 15. februar feira han 15 år som statsministerkatt. Det skriv nyheitsbyrået AP. Sidan Larry flytta inn i bustaden, har Storbritannia hatt seks statsministrar. Larry har også møtt fleire verdsleiarar, som den tidlegare amerikanske presidenten Barack Obama og den ukrainske presidenten Volodymyr Zelenskyj.
No er Larry 18 eller 19 menneskeår. Han bruker dagane på å helse på gjester, inspisere sikkerheita og teste kor gode dei antikke møblane er til å sove på, ifølge britiske myndigheiter.
