39 prosent av unge trur Noreg kan vinne VM
– Vi takkar for tilliten, seier landslagssjefen.
Over ein firedel av nordmenn trur Noreg kan vinne fotball-VM, viser ei undersøking som Norstat har gjort for Dagbladet. Særleg dei unge har stor tru.
28 prosent av dei spurde svarer ja på spørsmålet om Noreg kan vinne årets fotball-VM. 59 prosent svarer nei, medan 14 prosent har inga oppfatning, skriv Dagbladet.
Blant dei under 30 år er andelen mykje høgare – 39 prosent.
1000 personar er spurde i undersøkinga.
Landslagssjef Ståle Solbakken er forsiktig når han blir konfrontert med tala.
– Det er nok litt i optimistiske laget, men vi takkar for tilliten og skal gjere vårt beste, seier han til Dagbladet.
VM i Nord-Amerika blir det første sluttspelet for eit norsk A-landslag i fotball for menn sidan 2000.
