Vekas viktigaste: Våpenkvile, gruvetragedie og mobbetal

Minst 78 døde i gullgruve i Sør-Afrika

Fleire hundre arbeidarar har vore innestengde i ei ulovleg gullgruve i Sør-Afrika i fleire månader. Gruva ligg ved byen Stilfontein, 150 kilometer sørvest for Johannesburg. Torsdag seier styresmaktene i landet at det ikkje lenger skal vere nokon att i gruva, etter at minst 78 døde og over 200 overlevande har blitt henta ut.

Sidan november har sørafrikansk politi forsøkt å tvinge arbeidarane ut som ein del av ein aksjon mot ulovleg gruvedrift. Lokale styresmakter blokkerte vatn og mat til gruva. Ifølgje politiet nekta arbeidarane å forlate gruva i frykt for å bli arresterte, medan ein talsperson for gruvearbeidarane fortel til AP at politiet fjerna tauet arbeidarane brukte for å koma seg ut og inn av gruva.

Førre veke vedtok domstolen i landet at styresmaktene måtte sette i gang med ein redningsaksjon, som var starta måndag.

I Sør-Afrika er det mange gruver som er forlatne av større kommersielle aktørar, då dei ikkje lenger blir rekna som lønsame. Fleire av desse gruvene har blitt tekne over av kriminelle gjengar.

32 nye tiltak mot samehets

Tysdag lanserte regjeringa 32 nye tiltak for å motverke samehets. Det er ein del av handlingsplanen mot hets og diskriminering av samar for 2025–2030.

Fleire av tiltaka i handlingsplanen dreier seg om å hente inn kunnskap om truslar og trakassering mot samar, samiske debattantar og politikarar. Ifølgje Amnesty var det ein auke i negative kommentarar på 10 prosent etter Fosen-saka, og ein av fire kommentarar på Facebook om samar er negative.

Målet er også å auke merksemda og kompetansen i politiet om hatkriminalitet mot samar. I tillegg skal Likestillings- og diskrimineringsombodet skal også opprette ein filial med særleg kompetanse på det samiske.

Regjeringa vil blant anna:

• etablere samarbeidsforum mot hets og diskriminering av samar
• samarbeide med Sametinget og Samisk elevforum for å sikre medverknad
• styrke tilskotsordninga mot rasisme, diskriminering og hatefulle ytringar
• auke støtta til Stopp hatprat

Den suspenderte presidenten i Sør-Korea er arrestert

Yoon Suk-yeol, presidenten i Sør-Korea, vart arrestert onsdag. Han blir etterforska etter at han 3. desember forsøkte å innføre militær unnatakstilstand og sette til side nasjonalforsamlinga.

Yoon blir også etterforska i samband med ei korrupsjonssak blant høgstståande styresmaktpersonar i Sør-Korea.

Politiet måtte bryte seg inn i residensen til presidenten for å pågripe han. Det var mange tilhengjarar av Yoon utanfor bygget, og 3000 politifolk vart sett inn for å kome seg fram. Advokatane til Yoon seier at han vart med politiet frivillig, og at arrestordren er ugyldig.

Høge mobbetal i elevundersøkinga

12 prosent av elevar på 7. trinn oppgir at dei har vore utsette for mobbing. På 10. trinn er talet 11 prosent, og i fyrste klasse på vidaregåande er talet 6 prosent. Det kjem fram i Elevundersøkinga som vart lagt fram måndag.

Dei siste åra har det vore ein auke i mobbetala, men årets tal er på linje med fjoråret.

– Det er bra at andelen elevar som opplever mobbing ikkje aukar, men vi kan ikkje slå oss til ro med desse tala. Regjeringa har sett i gang ei rekke tiltak for betre skulemiljø, og i år styrkjer vi dette arbeidet ytterlegare, seier kunnskapsminister Kari Nessa Nordtun i ei pressemelding.

Samstundes seier 9 av 10 elevar i første klasse på vidaregåande, og i overkant av 8 av 10 elevar på 7. og 10. trinn, at dei trivst på skulen.

Elevundersøkinga vart gjennomført i november 2024. Rundt 442 000 elevar deltok i undersøkinga.

Lyspunkt: Norske Karen (21) er yngste som har nådd Sørpolen åleine

Karen Kyllesø (21) planta måndag kveld flagget sitt på Sørpolen. Med det er 21-åringen den yngste personen nokosinne som har nådd Sørpolen åleine.

Kyllesø la ut på ekspedisjonen i november, og gjekk i 54 dagar på ski.

– Eg har late meg styre veldig lite av kjensler, men no byrjar eg å kjenne meir på kjensler rundt det å kome fram. Eg gler meg til det. Det blir ein veldig stor dag i morgon, sa 21-åringen i ei talemelding dagen før bragda.