I dag kan du sjå ein komet på himmelen
12. oktober har vi sjansen til å sjå ein komet på himmelen dersom vi ser i rett retning til rett tid.
Denne saka var først publisert hos Framtida Junior.
Kometen med namnet Tsuchinshan-ATLAS har vore så nær sola at vi ikkje kan sjå han, men dette vil endre seg 12. oktober, står det på forskersonen.no.
Kometen vil då vere 71 millionar kilometer frå jorda. Det vil seie at han vil vere 180 gongar lengre bort enn månen.
Trass at dette høyrest langt unna ut, er det nærme nok til at vi kan sjå han frå jorda.
Kometen vil då skine lågt i vest idet skumringa senkar seg.
Gasshale
Kometar sitt tydelegaste kjenneteikn er at dei har hale.
Det får dei når dei kjem nær nok sola. Då byrjar dei frosne gassane på kometen å fordampe og lagar ei sky av gass rundt han.
Strålar frå sola dyttar denne skya vekk og kometen får dermed ein hale. Kor lang halen på kometen Tsuchinshan-ATLAS er, veit ikkje forskarane før dei ser han i helga.
