Finland vil sende pandaene Lumi og Pyry tilbake til Kina

I 2018 fekk Finland to pandabjørnar i gåve frå Kina. No skal dei sendast tilbake.

Ragnhild Marie Kjosbakken
Publisert 03.10.2024 09:10

Lumi og Pyry har budd i dyrparken Ähtäri Zoo i Finland i seks år. Etter planen skulle dei vere der til 2032, skriv The Guardian.

No vil finske myndigheiter sende pandaene tilbake til Kina fordi det kostar for mykje å ha dei i dyreparken.

Så langt har opphaldet til pandabjørnane kosta omtrent 94 millionar kroner.

Pandabjørnane blei gitt til Finland etter at Kinas president Xi Jinping og finske myndigheiter signerte ei avtale om å beskytte den sårbare arten.

Men no returnerer Lumi og Pyry til Kina åtte år tidlegare enn planlagt. Dei vil bli sett i ein månads lang karantene før heimreisa.

Årsaka til dette pandadiplomatiet er at Kina vil styrkje handelsavtaler og politiske forhold til andre land.