Unge er meir bekymra for framtida – berre éin av ti er optimistar
Halvparten av norsk ungdom er pessimistar, ifølgje Ung-rapporten frå Opinion i år. Dei bekymrar seg særleg for auka prisar, miljø og klima og uro i verda.
Ifølgje undersøkinga er berre 11 prosent av dei unge optimistar, medan heile 52 prosent er pessimistar. Resten er nøytrale. Fleirtalet av optimistane er menn frå Oslo med høg utdanning.
Optimismen har dalt noko dei siste to–tre åra, opplyser seniorrådgivar Vilde Vågsland i Opinion til Khrono. Ho fortel at ungdommen har fleire bekymringar enn før, ikkje berre for det som skjer her og no, men også om 10 til 15 år.
– Det er uvanleg. Det er ofte det som skjer i notida som opptek dei. No er det ei uro for kva som skal skje mange år fram i tid, seier Vågsland.
63 prosent oppgir at dei er bekymra for auka prisar, 52 prosent er bekymra for miljø og klima og 51 prosent for krig og uro i verda. Dette er omtrent same nivå som i fjor. Samtidig oppgir 47 prosent at dei er bekymra for spreiing av falske nyheiter.
Ung-undersøkinga blir gjennomført årleg for å kartleggje utviklingstrekk blant norsk ungdom i alderen 15–25 år. I undersøkinga i år har 1000 ungdommar delteke i den kvantitative delen av undersøkinga. I tillegg er det gjennomført 90 kvalitative intervju.
